FHN-in Beynəlxalq Axtarış-Xilasetmə Dəstəsinin şəxsi heyəti üçün növbəti kurs təşkil olunub

Bakı, 17 sentyabr, AZƏRTAC

Sentyabrın 16-17-də BMT-nin Azərbaycan nümayəndəliyinin, Azərbaycan Qızıl Aypara Cəmiyyətinin və Fövqəladə Hallar Nazirliyinin (FHN) birgə təşkilatçılığı ilə Beynəlxalq Axtarış-Xilasetmə Dəstəsinin şəxsi heyəti üçün “Beynəlxalq humanitar əməliyyatlarda iştirakın əsasları, beynəlxalq hüquq və davranış qaydaları” mövzusunda növbəti kurs keçirilib.

FHN-dən AZƏRTAC-a bildiriblər ki, kursun məqsədi şəxsi heyətin BMT-nin Humanitar Məsələlərin Əlaqələndirilməsi Ofisinin (UN OCHA) Beynəlxalq Axtarış-xilasetmə Məşvərət Qrupunun (INSARAG) sinifləndirilməsindən keçməyə hazırlanması, eləcə də beynəlxalq humanitar əməliyyatlarda iştiraka dair bilik və bacarıqlarının daha da artırılmasından ibarət olub.

Kursun gedişində BMT-nin Azərbaycandakı rezident əlaqələndirici ofisində humanitar məsələlər üzrə analitik Elgün Tağıyev və Azərbaycan Qızıl Aypara Cəmiyyətinin icraçı katibinin müavini Səbinə Məhbubi-İran, fövqəladə hallara hazırlıq şöbəsinin müdiri Elşən Səlimzadə Beynəlxalq Humanitar Əməliyyatlarda iştiraka dair beynəlxalq norma və qaydalar, fəaliyyətin əsas prinsipləri, etik və həssas məsələləri əhatə edən mövzularda təqdimatları dinlənilib. Həmçinin beynəlxalq humanitar əməliyyatlarda beynəlxalq təşkilatların rolu, BMT, Qırmızı Xaç və Qızıl Aypara cəmiyyətlərinin fəaliyyətinə dair məlumatlar kurs iştirakçılarının diqqətinə çatdırılıb.

Tədbirin sonunda Azərbaycan Qızıl Aypara Cəmiyyətinin fəaliyyətinə həsr olunmuş videoçarx nümayiş etdirilib.

Azertag.az

ƏVVƏLKİ XƏBƏR

Abbas Lisani: “Ədalətiniz varsa məhkəmənin qapılarını açın ki, qərarı millət özü versin!”

SONRAKI XƏBƏR

Kokorin və Mamayev azadlıqda