Azərbaycan və yaponiyalı seysmoloqlar Xəzər dənizində birgə tədqiqatlara başlaya bilər

Azərbaycan və yaponiyalı seysmoloqlar Xəzər dənizində birgə tədqiqatlara başlaya bilər

Azərbaycanda səfərdə olan Yaponiyanın “OYO” şirkətinin vitse-prezidenti Toti Hakada, baş mühəndis Eiti Uoide və katibi Sumiuo Qgo AMEA
nəzdində Respublika Seysmoloji Xidmət Mərkəzində Mərkəzin baş direktoru, AMEA-nın müxbir üzvü, professor Qurban Yetirmişli ilə görüşüblər.

AMEA nəzdində RSXM-nin İnformasiya şöbəsindən APA-ya verilən məlumata görə, görüşdə “OYO” şirkəti ilə Respublika Seysmoloji Xidmət Mərkəzinin uzun illərdən bəri əməkdaşlıq edildiyi və tərəflərin bu əlaqələrin daha da genişləndirilməsinə maraqlı olduqları vurğulanıb.

RSXM-nin baş direktoru, AMEA-nın müxbir üzvü Qurban Yetirmişli hazırda mərkəz tərəfindən aparılan tədqiqatlar barəsində ətraflı məlumat verərək, ikitərəfli əlaqələrlə yanaşı, birgə regional layihələr həyata keçirilməsinə dair təklif verib. Baş direktor birgə əməkdaşlığın tərəflər üçün də faydalı olduğunu bildirib.

Müzakirələr zamanı Xəzər dənizində birgə seysmoloji tədqiqatların aparılması və RSXM-nin dənizdibi seysmik stansiyalarının quraşdırılmasına yaponiyalı mütəxəssislər tərəfindən dəstək verlməsinə də toxunulub.

“OYO” şirkətinin vitse-prezidenti Toti Hakada Xəzər dənizində birgə əməkdaşlıqla bağlı təklifi müsbət qarşılayaraq, bu istiqamətdə layihənin
hazırlanmasının mümkün olduğunu deyib.

Hazırda Yaponiyanın okeanda sualtı stansiyalarının fəaliyyət göstərdiyini bildirən qonaq Xəzər dənizində dənizdibi stansiyaların quraşdırılmasının
Azərbaycanda aparılan seysmoloji tədqiqatların keyfiyyətinə də müsbət təsir göstərəcəyini deyib.

Toti Hakada RSXM-nin baş direktorunu 2020-ci ilin sentyabrında Tokioda keçiriləcək Beynəlxalq Seysmoloji Simpoziuma dəvət edib.

Tərəflər hazırda dünyada seysmoloji sahədə aparılan tədqiqatlarda istifadə edilən yeni cihazlar və texnologiyalara dair də fikir mübadiləsi aparıblar.

Mənbə: apa.az