Salyan rayonun beş kəndində mavi qaz olmadığından qış aylarında sakinlər sözün əsl mənasında zülüm çəkirlər.

Bu haqda Moderator.az-a Salyan sakinləri özləri məlumat veriblər və aidiyyatı qurumlardan onlara köməklik göstərilməsini xahiş edirblər.

Salyan rayonun Kürqaraqaşlı Ərazi İnzibati nümayəndəliyinin beş kəndi olan Kürqaraqaşlının özü də daxil olmaqla Beşdəli, Cəngən, Xocalı və Ərəbqardaşbəyli kəndində mavi qaz yoxdur. Burda isə 6500 civarında əhali yaşayır. 2010-cu ildə Kür çayının daşması nəticəsində ağır texnikalar burda bənd vurarkən kəndin yollarını da dağıdıb. Sonradan isə yolu təmir edən olmayıb. Bir sözlə, adı çəkilən kəndlərin yolları da bərbad vəziyyətdədir.

Qeyd etdiyimiz kəndlərdə 1988-ci ildən sonra mavi qaz olmayıb və insanlar odundan istifadə edirlər. Kəndin məktəbləri də odun sobalarıyla isidilir. Sakinlər müvafiq qurumlara şikayət etsə də, hələ ki, səslərinə-səs verən olmayıb. Kəndlərin elektrik enerjisiylə bağlı problemi yoxdur. Sakinlərin sözlərinə görə kəndləri qazla təmin etmək üçün elə böyük vəsait də təmin olunmur. Adı çəkilən problemlərlə bağlı Kürqaraqaşlının nə ərazi nümayəndəliyi, nə də bələdiyyəsi maraqlanmır. Bir sözlə, rayonda əlaqədar qurumlar işləmir.

Mövzu diqqətimizdədir.

Vasif Əlihüseyn

Mənbə: moderator.az