Bakı Apellyasiya Məhkəməsində "Real" MTK-nın icraçı direktoru, dələduzluqda təqsirli bilinən Sahil Cahangirlinin apellyasiya şikayətinə baxılıb.

“Report” xəbər verir ki, hakim Mirzəli Abbasovun sədrlik etdiyi prosesdə qərar elan edilib.

Qərara əsasən, şikayət təmin edilməyib və hökm dəyişdirilmədən saxlanılıb.

Qeyd edək ki, 1987-ci il təvəllüdlü S.Cahangirli Bakı Ağır Cinayətlər Məhkəməsinin hökmü ilə 7 il müddətinə azadlıqdan məhrum edilib.

O, Cinayət Məcəlləsinin 178.3.2-ci (külli miqdarda dələduzluq), 308-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə təqsirli bilinib.

S.Cahangirli "Real" MTK-nın həbsdə olan rəhbəri İlham Qasımovun bacısı oğludur.

O, bir mənzili bir neçə nəfərə satmaq ittihamı ilə daha əvvəl də həbs edilib və şərti cəza alaraq məhkəmə zalından azadlığa buraxılıb.

Xatırladaq ki, MTK-nın rəhbəri İ.Qasımov da evi bir neçə nəfərə satmaqla yanaşı, şəriki milyonçu şair Gülağa Tənhanın şikayəti əsasında da həbs edilib. O, şairin 19,5 milyon manatını mənimsəməkdə ittiham edilib.

Bakı Ağır Cinayətlər Məhkəməsinin hökmü ilə İ.Qasımov 15 il müddətinə azadlıqdan məhrum edilib. Bakı Apellyasiya Məhkəməsi onun cəzasını 12 ilə endirib.

İ.Qasımov "MTN işi"ndə general Akif Çovdarovun cinayət işi üzrə zərərçəkmişi kimi tanınıb.

Mənbə: report.az