Aftandil Hacıyev: "Futbolçularımızın fiziki durumu lazımı səviyyədə deyil"

"Rəqibin gücünün şahidi olduq. Azarkeşlər üçün maraqlı oyun alındı".

APA-nın məlumatına görə, bunu "Səbail"in baş məşqçisi Aftandil Hacıyev UEFA Avropa Liqasının I təsnifat mərhələsində Bakıda Rumıniyanın "Universitatya Krayova" komandasına 2:3 hesablı məğlubiyyətdən sonra deyib.

O, "ASCO Arena"da baş tutan mətbuat konfransında bildirib ki, rəqib həm daha keyfiyyətli futbolçulara malikdir: "Buna baxmayaraq yaxşı mübarizə apardıq. Sadəcə, rəqib futbolçuların fərdi ustalığı öz sözünü dedi".

Baş məşqçi deyib ki, komandanın hazırlıq səviyyəsinin istənilən şəkildə olmamasında nə rəhbərliyin, nə də məşqçilərin səhvi var: "Bu gün günahkar axtarmırıq. Sadəcə olaraq, səbəbləri deməliyəm. Futbolçularımızın fiziki durumu lazımı səviyyədə deyil. Yorulduqdan sonra konsentrasiya itməyə başlayır. Bu gün rəqib daha hazırlıqlı idi. "Səbail" gənc klubdur və stabil büdcəyə malikdir. Ancaq gələcəkdə büdcə artsa, daha yüksək səviyyəli oyunçular götürə bilərik. Demirəm ki, əlimizdə olanlar keyfiyyətsizdir. Sadəcə, heyəti daha da gücləndirə bilərik. Hazırda Mirabdulla Abbasovdan heç nə gözləmirik. Komandaya gec qoşulub. Onunla rəqabət aparacaq futbolçu yoxdur. Bu, problemdir. İstərdik ki, bəzi mövqelərdə rəqabəti artıraq".

Hacıyevin sözlərinə görə, "Səbail"in cavab matçında geridönüş etməsi çətin olacaq: "Oyuna müdaxilə etməkdə gecikdiyimizi düşünmürəm. İki və üçüncü qol ard-arda gəldi. Ağabala Ramazanova çempionatda da hücumda şans vermişik. Bu gün pis alınmadı. Amma rəqib topa sahib olmaq baxımından üstün idi. Futbolçularımız bilməlidirlər ki, səfərdə çətin olacaq. Cavab matçında geridönüş etmək çətin görünür. Səfərdə planımız gerçəkləşərsə, 2:0 hesabı ilə qalib gələ bilərik. Amma yenə də deyirəm ki, bu, çətin məsələdir. Bu gün "Səbail" ilə "Universitatya Krayova"nı müqayisə etmək hələ tezdir. Ancaq bu məqam bizi ruhdan salmır. Sürpriz hər zaman mümkündür".

A. Hacıyev qeyd edib ki, bu gün Maykl Essyenin "Çelsi"də, "Real"da oynayan vaxtı deyil: "O, iki ay yarım əvvəl komandamıza gəlib. Bundan öncə isə il yarım futbol oynamayıb. Essyenə görə kiminsə bizi varlı klub qismində qələmə verməyə normaldır. Ancaq reallıq fərqlidir. Essyenin hansı vəziyyətdə olmasını biz yaxşı bilirik".

Qeyd edək ki, bu komandalar arasında cavab matçı iyulun 18-də Krayovada olacaq.

Apa.az

ƏVVƏLKİ XƏBƏR

İlin əvvəlindən Taylandda 44 600 nəfər denqu qızdırmasına yoluxdu

SONRAKI XƏBƏR

Çin xüsusi aparat hazırladı - Marsda həyat əlaməti axtaracaq