Tomas Bax innovasiyalara görə Beynəlxalq Voleybol Federasiyasına təşəkkürünü bildirib

Tomas Bax innovasiyalara görə Beynəlxalq Voleybol Federasiyasına təşəkkürünü bildirib

Bakı, 5 dekabr, AZƏRTAC

Beynəlxalq Olimpiya Komitəsinin (BOK) prezidenti Tomas Bax innovasiyaların uğurla həyata keçirilməsinə görə Beynəlxalq Voleybol Federasiyasının (FIVB) prezidenti Ari Qrasa Filyoya təşəkkürünü bildirib. Bu barədə federasiyanın mətbuat xidməti məlumat yayıb.

AZƏRTAC xəbər verir ki, BOK-un Lozannadakı mənzil-qərargahında BOK və FIVB İcraiyyə komitələrinin görüşü keçirilib. Görüşdə çıxış edən Bax deyib: “Biz ən uğurlu federasiyalardan birinin nümayəndələrini görməyə şadıq. Siz idmanı necə uğurla inkişaf etdirməyi bilirsiniz, bütün problemlərin həlli yollarını tapırsınız və innovasiyaların tətbiqinə geniş yer ayırırsınız. Mən FIVB-in azarkeşlərin cəlb edilməsi sahəsində fəaliyyətini də qeyd etmək istərdim”.

Qrasa Filyoya görüşdə qeyd edib: “Ailə dəyərləri və gender bərabərliyi bizim üçün çox mühümdür, biz zərif cinsin nümayəndələrini həmişə dəstəkləyirik. Qadın komandaları da kişi idmançılarla bərabər mükafatlar alır, KİV-lərdə işıqlandırılır, maliyyə göstəriciləri eynidir. Hesab edirəm ki, bütün bunlar bizi digər idman növlərindən fərqləndirir”. Federasiya rəhbəri əlavə edib ki, BOK-un mənzil-qərargahında da işləyən personalın sayında qadınlarla kişilər bərabər bölünüblər, rəhbər vəzifələrin 45 faizini qadınlar tuturlar.

Görüşdə, həmçinin dopinqlə mübarizə, düzgün idarəçilik, ayrı-seçkiliyə yol verilməməsi, qarşıdakı Olimpiya oyunlarına və gənclərin Olimpiya turnirinə hazırlıq məsələləri müzakirə olunub. BOK-un idman direktoru Kit Makkonnell bildirib ki, 2016-cı ildə Rio-de-Janeyroda keçirilmiş Olimpiya oyunlarında qadın voleybolu yarışları televiziya tamaşaçıları arasında ən populyar turnir olub.

FIVB ilə görüş cari ilin iyununda Lozannada açılmış BOK-un mənzil-qərargahında federasiya ilə keçirilən ilk tədbir olub.

Mənbə: azertag.az