Azad Azərbaycan Televiziyasında (ATV) Əməkdar artist Məlahət Abbasovanın təqdimatında yayımlanan "Məlahətli söhbətlər" layihəsi artıq sözügedən telekanalda yayımlanmayacaq.
Veriliş yeni mövsümdən etibarən məhz Azərbaycan Dövlət Televiziyasında (AzTV)-də efirə gedəcək.
Layihə rəhbəri Məlahət Abbasova ATV-dən ayrılma səbəbini News.24.az-a açıqlayıb: "ATV-də rəhbərlik dəyişəndən sonra layihə formatının dəyişikliyi, yəni daha çox qalmaqalın olması istənildi. Dedilər ki, əks-halda layihə bağlanacaq. Qalmaqal sözünü eşidən kimi, oradan ayrılmaq qərarını aldım. Çünki bu formatda iki ölkə arasında olan dostluqdan, qardaşlıqdan, sevgidən danışılır. Qalmaqal, söz-söhbətlər bura üçün uyğun deyil. Daha sonra AzTV-dən təklif gəldi və bu təklifə çox sevindim. Çünki yaradıcılığımda ilk addımlarımı məhz burada atmışam. Rövşən müəllimlə danışdıq, razılaşdıq".
Əməkdar artist onu da bildirib ki, AzTV-nin rəhbərliyi tərəfindən ona heç bir şərt və qadağa qoyulmayb. "Məlahətli söhbətlər" verilişi qaldığı yerdən və eyni formatda yayımlanacaq. Dəyişikliklər ancaq yaradıcı heyətdə olacaq: "Bütün şərtlərimi qəbul etdilər. AzTV yeniliklər edir, köhnə cızığından çıxır və möhtəşəm işlərə imza atır. Ona görə də, burada olmaq mənim üçün ancaq qürurdur. Artıq 7 verilişimiz çəkilib. Qonaqlarımız da AzTV-ni tanıyırlar. Bu isə sevindirici məqamdır. Layihəmiz sentyabrın ortası başlayacaq. Verilişin həftə sonu saat 22:00-da yayımlanması nəzərdə tutulur".
Sevda Bayramova
Mənbə: news24.az