Fransa polisi “milli qəzəb yürüşü” barədə xəbərdarlıq edib

Fransa polisi “milli qəzəb yürüşü” barədə xəbərdarlıq edib

Paris, 11 sentyabr, AZƏRTAC

Fransada polis işçilərinin həmkarlar ittifaqları təşkilatları polis əməkdaşlarını oktyabrın 2-də “milli qəzəb yürüşü”nə çıxmağa çağırıb. Həmkarlar təşkilatları bu çağırışla mövcud böhranla əlaqədar hakimiyyətə xəbərdarlıq etmək, polislərin həyat və iş şəraitinin dözülməz olduğunu xatırlatmaq istədiklərini bildiriblər.

Sosial şəbəkələrdə 20-yə qədər həmkarlar təşkilatı cari ilin əvvəlindən intihar etmiş 48 polis əməkdaşının fotoşəkillərini nümayiş etdirərək iş şəraitinin təkmilləşdirilməsini tələb edib. Polislərin həddən artıq istismar olunduqları, onların müdafiəsinin təmin edilmədiyi, əməklərinin lazımınca qiymətləndirilmədiyi bildirilərək, sözdən əmələ keçmək üçün bütün polis əməkdaşlarının oktyabrın 2-də birgə hərəkət etmələri barədə çağırışlar səsləndirilir.

Fransada polis əməkdaşlarının sonuncu etiraz yürüşü 15 il əvvəl olub.

Şəhla Ağalarova

AZƏRTAC-ın xüsusi müxbiri

Paris

Mənbə: azertag.az