Ağcabədidə çağırışçı gənclər müddətli həqiqi hərbi xidmətə yola salınıblar

Ağcabədidə çağırışçı gənclər müddətli həqiqi hərbi xidmətə yola salınıblar

Bakı, 9 oktyabr, AZƏRTAC

Ağcabədidə çağırışçı gənclər müddətli həqiqi hərbi xidmətə yola salınıblar.

Səfərbərlik və Hərbi Xidmətə Çağırış üzrə Dövlət Xidmətindən (SHXÇDX) AZƏRTAC-a bildiriblər ki, oktyabrın 9-da Ağcabədi rayonunda təntənə ilə keçirilən yolasalma mərasimində Xidmətin rayon şöbəsinin şəxsi heyəti, icra hakimiyyətinin, idarə və təşkilatların, eləcə də hüquq-mühafizə orqanlarının əməkdaşları, təhsil işçiləri, ziyalılar, ağsaqqallar, Qarabağ müharibəsi veteranları, valideynlər, ictimaiyyətin, kütləvi informasiya vasitələrinin nümayəndələri, mədəniyyət və incəsənət adamları iştirak ediblər.

Azərbaycan Respublikasının dövlət himninin səsləndirilməsi ilə başlayan mərasimdə çıxış edən Ağcabədi Rayon İcra Hakimiyyətinin başçısı Şahin Məmmədov Prezident, Silahlı Qüvvələrin Ali Baş Komandanı İlham Əliyevin ordu quruculuğu sahəsində həyata keçirdiyi islahatlardan söz açıb. Azərbaycan Silahlı Qüvvələrinin işğal altındakı torpaqlarımızı azad etmək gücündə olduğu diqqətə çatdırılıb.

SHXÇDX-nin Ağcabədi Rayon Şöbəsinin rəisi, polkovnik-leytenant Ramil İsmayılov hərbi xidmətə yola düşmələri münasibətilə gəncləri təbrik edərək onlara dəyanətli, əzmkar olmalarını, komandirlərin əmr və tapşırıqlarını vaxtında və dəqiq yerinə yetirmələrini və hərbi bilikləri mükəmməl öyrənməyi tövsiyə edib.

Çağırışçı Fərid Hüseynovun babası Ədalət Hüseynovun çıxışı mərasim iştirakçıları tərəfindən maraqla qarşılanıb. O, nəvəsini və hərbi xidmətə yollanan gəncləri təbrik edərək bu günün onlar üçün əlamətdar olduğunu vurğulayıb, çağırışçılara nümunəvi xidmət etməyi, Azərbaycan əsgəri adını şərəflə daşımağı arzulayıb.

Tədbirdə Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyi Ağcabədi rayon filialının sədri İsmayıl Məhərrəmov xalqımızın qəhrəmanlıq ənənələrindən danışıb, hərbi xidmətə yola düşən gənclərə ölkəmizin ərazi bütövlüyü uğrunda şücaət göstərmiş vətən övladlarından nümunə götürməyi tövsiyə edib.

Hərbi xidmətə yollanan gənclərin adından çıxış edən Fərid Xankişiyev Vətəni qorumaq kimi müqəddəs vəzifələri yerinə yetirəcəklərindən qürur hissi duyduqlarını bildirib.

Mərasimin sonunda gənclər Azərbaycan bayrağını öpərək həqiqi hərbi xidmətə yola düşüblər.

Mənbə: azertag.az