Avropa Komissiyası koronavirus əleyhinə vaksinin sifarişi üzrə 6-cı müqaviləni imzalayıb

Avropa Komissiyası koronavirus əleyhinə vaksinin öncədən sifarişi üzrə sayca altıncı müqaviləni imzalayıb.

SİA "TASS" informasiya agentliyinə istinadla xəbər verir ki, Avropa Komissiyasından olan mənbənin məlumatına görə, bu dəfə müqavilə “Moderna” kompaniyası ilə bağlanıb. Beləliklə, qurum vaksinin öncədən sifarişi üzrə portfelin formalaşdırılmasını başa çatdırıb.

Qurumun rəhbəri Ursula fon der Lyayenin yaxın vaxtlarda bu barədə rəsmi bəyanatla çıxış edəcəyi gözlənilir.

Qeyd edək ki, Avropa Komissiyasının vaksinasiya strategiyasına “AstraZeneca”, “Sanofi – GSK”, “Johnson & Johnson”, “BioNTech – Pfizer”, “CureVac” və “Moderna” kimi qərb kompaniyaları ilə öncədən sifariş barədə müqavilələrin imzalanması daxildir. Əgər bütün həmin kompaniyalar öz vaksinlərini hazırlayıb bazara çıxara bilsə, Avropa İttifaqı ümumilikdə 2 milyard vaksin dozası əldə edəcək. Lakin hələlik onların istehsalının real imkanları və çatdırılma vaxtı qeyri-müəyyən olaraq qalır.

Sia.az

ƏVVƏLKİ XƏBƏR

“Türklərin qabağında diz çökənlər arasında o da var” – Ruben Məlikyan

SONRAKI XƏBƏR

Kəlbəcəri tərk edən ermənilərin "yanmış torpaq" strategiyası AK-nın diqqətindən yayınmadı - "Europe Diplomatic"