Bu gün professor Yalçın Əlizadənin doğun günüdür. Uzun illər Jurnalistika fakültəsinin (BDU) dekanı və kafedra müdiri olub. Çoxlarından fərqi odur ki, əxlaq və mənəviyyat adamıdır, ustad qələm sahibi, radio yaradıcılığının ən gözəl tədqiqatçısı, əsl alim və klassik pedaqoqdur. Tələbkarlığı ilə xeyirxahlığı həmişə yanaşı olub. Onu mənə ən çox sevdirən daim şəxsi ləyaqət hissini qoruması, prinsipiallığı və parlaq şəxsiyyətidir.
Böyür-başımızda yaltaqlığın tüğyan etdiyi, elmi dərəcə, şöhrət, orden-medal, mövqe möhkəmləndirmək üçün qələmə sarılıb vəzifə adamlarına saxta mədhiyyələr yazan əldəqayırma professorların çoxaldığı bir vaxtda Yalçın müəllim həmişə ziyalı qürurunu saxıayıb, yüksək mənlik nümayiş etdirib. Ondan tərif umsalar da oğurluq, rüşvət, korrupsiya hesabına pul və sərvət qazananlara “dövlət adamı” deməyib. Yalnız gerçəyi, doğru olanı deyib və yazıb Yalçın müəllim. Əslində bütün ömrünü namusla yaşayan nəcabətli insanların başqa cür olması da mümkünsüzdür.
Yalçın müəllim ümumən ali məktəb tədrisinin, o cümlədən jurnalistika təhsilinin gözəl bilicisi və bacarıqlı təşkilatçıdır. Vaxtilə ölkənin tanınmış alimlərini və praktik media adamlarını jurnalistika fakültəsundə dərs deməyə cəlb etməklə tələbələrdə fərqli maraq yarada bilirdi. Məni də əvvəlcə saathesabı dərs deməyə, sonra isə ştata Yalçın müəllim dəvət etmişdi. 1998-ci ildə mənim ştatla müəllimliyə könlümün olmadığını görəndə o vaxt rektoru əvəz edən çox böyük alim və qiymətli insan kimi tanıdığım akademik Bəhram Əsgərovu işə qoşmuşdu...
Professor Yalçın Əlizadə o adamdır ki, indiki mənəviyyat böhranı şəraitində insanın şəxsiyyət və ləyaqətinin hər cür vəzifədən yüksək olduğunu dəfələrlə nümayiş etdirib. Həmişə ictimai əxlaqı üstün tutub, sümüksüz və onurğasız “ziyalılar”dan fərqli olaraq bu əxlaqa uyğun gəlməyən hər hansı davranışa sərt şəkildə “yox” deyə bilib.
O, vəzifə və mənsəb xatirinə haqsızlığın, kobudluğun, ədəbsizliyin qarşısında susmayıb. Bir neçə il əvvəl BDU-da önəmli yubiley toplantısında Yalçın müəllimin çox ağayana və ləyaqətli davranışının şahidi oldum. Həmin toplantıda çıxış edərkən rektorun yekəxana və kobud iradını Yalçın müəllim qəbul etmədi. Nəzakətlə, təmkinini pozmadan acı yumorla rektorun cavabını verdi. Ertəsi gün isə ərizə yazaraq dekanlıqdan və kafedra müdiri vəzifəsindən imtina etmişdi. Onu dilə tutmağın xeyri olmamışdı-adam vəzifəni yox, QÜRURU və şəxsi LƏYAQƏTİ seçmişdi.
Professorun bu qürurlu addımı ilə təəssüf ki, fakültənin tarixində ciddi bir mərhələ bitmiş oldu. Bundan sonra diletantlara və mənəviyyat dəllallarına yol açıldı, fakültənin nizamı da xeyli pozuldu.. Yaxşı ki indi vəziyyət dəyişir, çünki yenə də sükan arxasında Yalçın müəllimin əlindən su içənlərdir! Doğum gününüz mübarəkdir, Yalçın müəllim! Televiziya və radio yaradıcılığının inkişafı, media sahəsi, jurnalistika elmi, jurnalistika təhsili üçün gördüyünüz böyük işlər heç vaxt unudulmayacaq... Bir də jurnalist üçün vacib olan mənəvi keyfiyyətlər-şərə müqavimət, ruhun diriliyi və əxlaqi bütövlük sahəsində şəxsi nümunəniz həmişə yaddaşlarda qalacaq!
Mənbə: moderator.az
scorpion.az