Həkim immunoloq: Çin vaksinlərinin keyfiyyəti ilə bağlı şübhələr əsassızdır

Həkim immunoloq: Çin vaksinlərinin keyfiyyəti ilə bağlı şübhələr əsassızdır

Yanvarın 18-də Azərbaycanda COVID-19 əleyhinə vaksinasiya prosesi başlayıb. İlkin mərhələdə tibb işçiləri, təhlükəsizlik orqanları əməkdaşları və 65 yaşından yuxarı şəxslər peyvənd olunacaq.

Koronavirus əleyhinə vaksinasiya kampaniyasının aktual məsələlərini müzakirə etmək üçün Media.Az əməkdaşları həkim immunoloq-allerqoloq, ilkin immun çatışmazlıqları üzrə Rusiya milli ekspertlər assosiasiyasının üzvü Marqarita Kantaroviçlə söhbət ediblər.

Həkim ölkəmizdə tətbiq olunan CoronaVac (Sinovac) peyvəndi barəsindəki şübhələri bölüşmədiyini qeyd edib:

“Mən Çin əczaçılıq sənayesinə olan inamsızlığı anlamıram. Bir baxın, görün çinlilər necə yüksək inkişaf etmiş texnoloji cəmiyyət qura biliblər. Görük ilkin epidemiya ocaqları necə tez bir zamanda lokallarşdırıldı və bunun sayəsində ölkədə virusun kütləvi yayılmasının qarşısı alındı. Çin peyvəndləri ilə bağlı bütün sənədlər qaydasındadır və onlar beynəlxalq tibb ictimaiyyəti tərəfindən tanınıb”.

İmmunoloq bir çoxlarını narahat edən peyvənd olunmuş şəxslərin yoluxması ehtimalından da danışıb:

“Heç bir vaksin virusdan 100% müdafiə etmir. Lakin yoluxma ehtimalını 100-lərcə dəfə aşağı salır. Nə vaxt eşitmişiniz ki, uşaqlardan kimsə difteriya və ya poliomelitdən dünyasını dəyişib, yaxud da iflic olub. Halbuki bu xəstəliklərə qarşı kütləvi peyvəndlənmədən öncə hər il 50 mindən çox uşaq ölürdü. İndi isə adıçəkilən xəstəliklərin qarşısı demək olar ki tamamilə alınıb. Biz koronavirus peyvəndindən də eyni nəticəni gözləyirik. Vaksin xəstəliyə yoluxma ehtimalını azaltmaqla yanaşı, həm də onun ağır formada keçirilməsini də önləyir”.

M.Kantaroviç onu da əlavə edib ki, SARS-CoV-2 peyvəndi qısa bir zaman ərzində hazırlanıb. Çünki, koronavirus bütün bəşəriyyəti qorxuya salıb. Bu peyvəndlərin hazırlanmasında dünyanın ən yaxşı beyinləri iştirak edib. Odur ki, vaksinlərin keyfiyyəti ilə bağlı şübhələr əsassızdır.

Mənbə: www.oxu.az