Dünyanın ən zəngin insanları necə boşanır? – Biri azərbaycanlıdır...

Məşhur cütlüklər adi insanların birliyi kimi tez-tez dağılır. Amma onların arasında bir fərq var — məşhur şəxsiyyətlərin münasibətlərində hər hansı bir ixtilaf dərhal ictimailəşir və yüz minlərlə pərəstişkarın müzakirə obyektinə çevrilir.

Belə boşanma prosesləri mətbuatda həmişə geniş işıqlandırılır - jurnalistlər varlıların əmlakının bölünməsinin təfərrüatlarını, habelə keçmiş həyat yoldaşlarının nəhəng pul kompensasiyalarının sayını aşkara çıxarırlar.

Paralel.az lent.az-a istinadla dünyanın ən varlı cütlüklərinin boşanmalarının arxasında duran dramatik hadisələr, eləcə də keçmiş tərəfdaşların boşanma nəticəsində əldə etdikləri böyük məbləğlər haqqında faktları təqdim edir.

Kitab imperiyasında ixtilaf

“Amazon”un qurucusu Seff Bezos və Makkenzi Skott un boşanması təkcə tarixin ən bahalı deyil, həm də ən səs-küysüz boşanmalarından birinə çevrilib. Cütlük 25 illik evlilikdən sonra ayrılıb və dostluq münasibətlərini qoruyub saxlaya bilib. Keçmiş həyat yoldaşları Çində övladlığa götürdükləri üç oğlan və bir qızı böyüdürlər.

Jurnalistlər hesab edirlər ki, sahibkar 1994-cü ildə Skott ona “Amazon”u yaratmağa kömək etdiyi üçün birgə əldə etdiyi əmlakın bölünməsinə xəsislik etməyib. Məhz Makkenzi Ceffə internetdə kitab satmağı təklif edib. Başlanğıc üçün, yeni evlənənlər çox böyük maaşlı işlərini tərk ediblər və Nyu-Yorkdakı geniş bir mənzildən ABŞ-ın ən böyük kitab distribüterlərindən biri olan Ingramın yerləşdiyi Sietliyə köçüblər.

Humanitar təhsil almasına baxmayaraq, Makkenzi şirkətin ilk mühasibi olub. O, “Amazon”un inkişafında fəal iştirak edib: sifarişləri emal edib, ilk paketləri poçtla göndərib, investorlarla görüşüb və digər vəzifələri yerinə yetirib. Yazıçı Bred Stoun “The Everything Store: Ceff Bozes və Amazon dövrü” kitabında qeyd edib ki, startapın ilk illərində Bezos üçün həyat yoldaşının fikri həmişə birinci yerdə olub.

683 milyard dollar

“Amazon”un dəyəri “BrandZ Top 100 Most Valuable Global Brands”un hesabatına görə 2021-ci ildə bu qədər olub.

Həyat yoldaşları arasında nikahdan əvvəl razılaşma olmamasına baxmayaraq, onlar çox milyonluq əmlaklarını sülh yolu ilə bölüşə biliblər. Makkenzi keçmiş ərinin sərvətinin yarısını (70 milyard dollar) tələb edə bilərdi, lakin daha kiçik bir məbləğ istəyib. Nəticədə o, “Amazon”dakı ümumi payının dörddə birini - təxminən 38 milyard dollar alıb.

Skottun kompensasiya pulu dünya tarixində ən böyük boşanma məbləği olub. Eyni zamanda, iş qadını “Blue Origin” aerokosmik şirkətinə iddia etməyib və könüllü olaraq “The Washington Post” nəşrlər evinin səhmlərindən imtina edib. “Forbes” jurnalının məlumatına görə, boşanma sayəsində o, 53 milyard dollarlıq kapitalla dünyanın ən zəngin qadınları siyahısında üçüncü sırada qərarlaşıb.

Sistem nasazlığı

Bill və Melinda Qeyts Bezoslar kimi, 1987-ci ildə “Microsoft”un ofisində sevgi romantikası yaşayıblar. Həmin vaxt Melinda şirkətdə proqramçı kimi işləyirdi və gələcək həyat yoldaşı ilə Nyu-Yorkda keçirilən konfransda təsadüfən tanış olmuşdu. İş adamı dərhal riyaziyyatda çevik ağlı və parlaq biliyi ilə seçilən işçi ilə maraqlanır.

Cütlük 1994-cü ildə Havay adalarında evlənib. Şayiələrə görə, toy onlara bir milyon dollara başa gəlib. Onların həyatı ilk övladlarının doğulması ilə kəskin şəkildə dəyişib: Melinda işini tərk edib özünü uşaq böyütməyə həsr etmək qərarına gəlib, bu da ərini şoka salıb. Həmin vaxt o, “Microsoft”un top-menecmetində (yüksək rəhbərliyində) yeganə qadın idi.

Üç uşağın doğulduğu Qeytslərin evliliyi ideal görünürdü: onların münaqişələri və fikir ayrılıqları haqqında məlumatlar heç vaxt mətbuata sızmayıb. Ancaq 2021-ci ilin may ayında cütlük 27 illik evlilikdən sonra ayrıldıqlarını elan edərək ictimaiyyəti çaş-baş salıb. Onlara yaxın mənbələr bildiriblər ki, evlilikdə son bir neçə ildə hər şey kənardan göründüyü qədər yaxşı olmayıb və Melinda boşanmanın təşəbbüskarı olub.

“The Wall Street Journal”ın məlumatına görə, münasibətlərdəki ixtilafın digər səbəbi Qeytsin azyaşlıları fahişəliyə sövq etməkdə ittiham olunan maliyyəçi Ceffri Epşteynlə ünsiyyəti ola bilərdi. Ehtimal olunur ki, maliyyəçinin əlaqələrinin köməyi ilə Qeyts xeyriyyəçilik sahəsindəki fəaliyyətinə görə Nobel sülh mükafatını almaq istəyib.

Keçmiş ər-arvad nikah müqaviləsi imzalamamışdılar, buna görə də Melindanın keçmiş ərinin sərvətinin yarısını alması ehtimalı var idi. Digər şeylər arasında, ailə “Four Seasons” otellər şəbəkəsinin, Kanada milli dəmir yolunun və “AutoNation” avtomobil dilerinin səhmlərinin sahibidir və eyni zamanda 24 vanna otağı olan bir malikanə, batut gimnastikası zalı və ən nadir sənəd artefakt nümunələri olan böyük bir kitabxana da daxil olmaqla bir neçə binaya sahibdir.

“Forbes”in 2021-ci ildəki reytinqinə görə, “Microsoft”un yaradıcısının varidatı 124 milyard dollardır.

Qeytslərin ayrılmasının təfərrüatları açıqlanmayıb, lakin dəqiq məlumdur ki, boşanma prosesi başa çatdıqdan sonra keçmiş arvadı biznesmendən ümumi dəyəri 5,7 milyard dolları ötmüş qiymətli kağızlar alıb.

Səhmlərin köçürülməsi Melindanın sərvətini əhəmiyyətli dərəcədə artırıb, bu da onu dünyanın ən zənginlərindən birinə çevirib: “Forbes”in reytinqində o, qadınlar arasında 27-ci yeri tutub. Eyni zamanda, Bill Qeyts boşanmadan çox ziyan çəkib və dünyanın ən varlı adamları siyahısında dördüncü yerə düşüb.

Qaçan şahzadə

Birləşmiş Ərəb Əmirliklərinin (BƏƏ) baş naziri Məhəmməd bin Rəşid Əl Məktum və İordaniya şahzadəsi Haya bint əl-Hüseyninin boşanma prosesi Böyük Britaniya tarixində nəinki ən bahalı, həm də ən qalmaqallı olub. 72 yaşlı şeyxin altı arvadından biri 2019-cu ilin aprelində oğlu və qızı ilə birlikdə 40 milyon dollar götürərək Londona qaçıb.

Haya bildirib ki, qaçışa səbəb ərinin 11 yaşlı qızı Cəliləni Səudiyyə Ərəbistanının vəliəhd şahzadəsinə ərə vermək niyyəti olub. O, ərinin başqa arvaddan olan qızı şahzadə Lətifənin taleyi ilə bağlı təfərrüatları da cangüdəndən öyrənib. Qız 2018-ci ilin martında ölkədən qaçmağa cəhd edib, lakin o, tutularaq BƏƏ-yə qaytarılıb.

İordaniyanın hazırkı kralı II Abdullahın bacısı Haya əvvəlcə keçmiş ərini məhkəməyə verərək 1,4 milyard funt sterlinq tələb etməyi planlaşdırırdı. "Ananın maddi iddiaları və tələb olunan təzminat məbləği misilsizdir", - şeyxin vəkili Naycel Dayer məhkəmə dinləməsi zamanı deyib.

Məhəmməd bin Rəşid Əl Məktum keçmiş həyat yoldaşına 550 milyon funt-sterlinq ödəməyə məcbur olacaq.

Hakim Filip Mur vurğulayıb ki, məbləğin böyük hissəsi qadının və Rəşid Əl Məktumdan olan uşaqların təhlükəsizliyi üçün nəzərdə tutulub. Bundan əlavə, hakim şeyxin keçmiş arvadına nikahın pozulması nəticəsində itirdiyi dəbdəbəli əmlakın dəyərini ödəməli olacağına qərar verib.

BƏƏ-nin baş naziri üç ay ərzində övladlarının anasına birdəfəlik 251,5 milyon funt sterlinq ödəməyə borcludur ki, bu pulun bir hissəsini İngiltərədəki malikanələrinin saxlanması üçün xərcləyəcək. Onun fikrincə, bu məbləğ Dubayda qalan bəzək əşyaları və yarış atları üçün ədalətli kompensasiyadır.
Şeyx Məhəmməd həmçinin uşaqların təhsili üçün üç milyon funt-sterlinq ayıracaq və 9,6 milyon funt-sterlinq təhsil borcunu ödəyəcək. Uşaqların saxlanması və yetkin olduqdan sonra təhlükəsizliyinin təmin edilməsi üçün o, ildə 11,2 milyon funt sterlinq xərcləməli olacaq.

"Hörmətə belə layiq deyil"

Rəşid Əl Maktumun hekayəsindən əvvəl Böyük Britaniyada ən bahalı boşanma statusu Rusiya vətəndaşlarına - Fərhad və Tatyana Əhmədova məxsus idi. 2016-cı ildə London Ali Məhkəməsi milyarderə keçmiş həyat yoldaşına 453 milyon funt sterlinq məcburi ödəməsi ilə qərar çıxarıb. Onun payına malikanələr, yaxta, helikopter, şəxsi təyyarə və sənət əsərləri də daxil idi.

Vəkillərin qərarının əksinə olaraq, oliqarx əmlakının bölünməsindən imtina edib və bu, uzun məhkəmə çəkişməsi ilə nəticələnib. Əhmədov qərarın, ümumiyyətlə, qanunsuz olduğuna israr edib - guya ər-arvad 2000-ci ildə Moskvada boşanıblar. Lakin onun sözlərini təsdiqləmək üçün hakimə təqdim etdiyi sənədin həqiqiliyinə şübhə yaranıb və qərar qüvvədə saxlanılıb.

Tatyana Əhmədova şikayət edib ki, keçmiş əri könüllü olaraq bir qəpik də ödəməyib və məhkəmə qərarı çərçivəsində ondan cəmi 7 milyon dollar və nasaz helikopteri geri ala bilib. Sonra qadın oğlu Teymurun borcunu ödəməməsi üçün atasına əmlakı gizlətməyə kömək etdiyinə inanaraq ona qarşı şikayət göndərmək qərarına gəlib.

Əhmədovanın fikrincə, ondan əmlak gizlətmək sxemlərindən biri də keçmiş ərinin xaricdəki aktivlərinin oğlunun adına yenidən rəsmiləşdirilməsi olub.

Beləliklə, Teymur Londonun “One Hyde Park”ındakı ən bahalı yaşayış kompleksində mənzilin, Moskvanın mərkəzindəki tarixi malikanənin və müasir incəsənət kolleksiyasının sahibi olub. Bundan əlavə, o, bir neçə il ərzində atasından 100 milyon dollardan çox bank köçürməsi alıb.

Nəhayət, London məhkəməsi Teymur Əhmədovu anasına təxminən 75 milyon funt-sterlinq ödəməyə məcbur edib. Gəncin atası hökmü “atanın günahını günahsız və satqın oğlunun üzərinə yükləmək cəhdi” adlandırıb. Onun fikrincə, ananın belə davranışı “hətta nifrətə layiq deyil”.

“Bütün xoşbəxt ailələr bir-birinə bənzəyir, hər bədbəxt ailə özünəməxsus şəkildə bədbəxtdir”, - hakim Qvinnet Houlz məhkəmə prosesinin sonunda belə deyib.

Boşanma prosesi zamanı ər-arvad arasında yaranan məhkəmə çəkişməsi yalnız 2021-ci ilin iyul ayında başa çatıb. Keçmiş senator maliyyə mübahisəsinə son qoymaq üçün keçmiş həyat yoldaşına 186 milyon dollar ödəməyə razıdır. Tatyana cütlüyün evliliklərində sahib olduqları nağd pul və sənət əsərləri şəklində təzminatı qəbul edib.

Qəddarcasına intiqam

30 illik evlilikdən sonra həyat yoldaşı Syudan ayrılması amerikalı maliyyəçi Bill Qrossun həyatını kəskin şəkildə dəyişib. Keçmiş həyat yoldaşına sərvətinin yarısının birdəfəlik məbləğini - 1,3 milyard dollar ödəməli olub ki, bu da onu “Forbes”in ən varlı adamlar siyahısından həmişəlik kənarlaşdırıb. Syu, əksinə, boşandıqdan sonra gözlənilmədən jurnalın reytinqinə düşüb.

“Forbes”in reytinqinə əsasən, Syu Qressin kapitalı 1,5 milyard dollardır.

Boşanma prosesi zamanı ər-arvad arasında münasibətlər çox gərginləşib. Bir-birlərini açıq şəkildə psixi problemləri olmaqda ittiham etməyə başlayıblar və bununla da əmlakı özləri üçün mümkün qədər sərfəli şəkildə bölüşdürməyə çalışıblar. Nəhayət, məhkəmə onların bir-birinə yaxınlaşmasını qadağan edib.

Maliyyəçi üçün ən ağrılı itki yüz milyonlarla dollar təzminat deyil, onun keçmiş həyat yoldaşının Kaliforniyadakı “Laguna Beach”də nəhəng malikanəsinə sahib olması faktıdır. Məhkəmənin belə bir qərarı Qrossu qane etməyib və o, keçmiş həyat yoldaşından qisas almaq qərarına gəlib.

Oliqarx evə üfunətli spreyləri səpilməsinə, havalandırma dəliklərinə çürük balıqların qoyulmasına göstəriş verib. Bundan əlavə, Qrossun əməkdaşları məqsədyönlü şəkildə malikanəni su ilə dolduraraq, oranı təchiz edən texnikanı sıradan çıxarıblar. Syunun sözlərinə görə, naməlum şəxslər hətta onun evinə girərək içərini dağıdıblar və bu səbəbdən o, yenidən keçmiş ərinə qarşı iddia qaldırıb.

Syu qisas almaqda keçmiş ərindən geri qalmayıb. O, Pablo Pikassonun uzun illər yataq otağında çarpayının üstündən asılan “İstirahət” tablosunu ala bilməyəcəyindən qorxub və orijinalı gizlədib, onu özü çəkdiyi nüsxə ilə əvəz edib.

Nəhayət, Pikasso onun mülkiyyətinə keçib və bu da maliyyəçini qəzəbləndirib. O, tablonun dəyişdirilməsindən də xəbər tutub və bu, onu daha da qəzəbləndirib. Daha sonra keçmiş arvad tablonu hərracda ilkin dəyərindən bir neçə dəfə baha -35 milyon dollara satıb.

Pişik qadın

Kübar dişi aslan Coslin Vildenşteyn boşanmadan xeyli əvvəl məşhurlaşmışdı-camaat onu onlarla plastik əməliyyatla vəhşi görünüş əldə etmək istəyi üçün “pişik qadın” adlandırmışdı. Sonradan qadının cərrahi müdaxilələrə aludə olması onun sənət kolleksiyaçısı Alek Vildenşteyndən ayrılmasına səbəb oldu.

Əvvəlcə Alek arvadının ehtirasını alqışlayıb və ona dəyişikliklər üçün pul verib. Üstəlik, bir dəfə cütlük eyni vaxtda blefaroplastika edib, lakin tezliklə art-diler (sənət satıcısı) həyat yoldaşının hobbisinin nəzarətdən çıxdığını başa düşüb.

“Coslin dəli olub. O elə bilirdi ki, üzünü hansısa mebel kimi düzəldə bilər”, - Alek Vildenşteyn “Vanity Fair”ə müsahibəsində belə demişdi.

Boşanma prosesinin başlanğıcı üçün son damla Vildenşteynin 21 yaşlı rus model yelena Jarikova ilə xəyanəti olub. Arvad ərini başqası ilə çarpayıda tutub, bunun ardınca mübahisə düşüb, ər arvadına silah tuşlayıb. Bundan sonra onu tərk etmək qərarına gəlib.

“Mənim ərimə daha ehtiyacım yoxdur, çünki o, bizim sərvətimizi yeni sevgilisinə xərcləməyə üstünlük verir”, - incimiş Coslin məhkəmədə deyib. Nəticədə Coslin Vildenşteynə 2,5 milyard birdəfəlik təzminat verilib. Art-diler keçmiş arvadına boşandıqdan sonra 13 il ərzində hər il 100 milyon dollar ödəməyə məcbur edilib.

Bununla belə, hakim Coslinin ərindən aldığı vəsaiti sonrakı plastik əməliyyatlar üçün istifadə etmək hüququna malik olmadığı haqda qərar çıxarıb.

Kolleksiyaçı yenidən evlənib - Rusiyadan olan Lyubov Stupakova onun ortağı olub. Bununla belə, kolleksiyaçı Coslin Vildennşteyn ilə razılaşmanı sona qədər yerinə yetirə bilməyib: 2008-ci ildə milyarder xərçəngdən ölüb.

Pula əlavə olaraq, “pişik qadın” təxminən 10 milyon dollar dəyərində zərgərlik kolleksiyası, həmçinin Vildenşteynin romantik münasibət zamanı aldığı 350 min dollara “Chanel” paltarları əldə edib.

Kübar dişi aslan buna baxmayaraq, keçmiş ərindən aldığı bütün pulları xərcləməyib və 2018-ci ildə özünü müflis elan edib. Bu səbəbdən Coslin “Trump World Tower”in bütün 51-ci mərtəbəsini tutan Manhettenə panoramik mənzərəsi olan mənzilini satışa çıxarıb. Yaşayış sahəsinin dəyəri 12,9 milyon dollar olub.

Rus izi

Məşhur nikahlar arasında elələri var ki, onlar əbədi və toxunulmaz bir şey kimi qəbul olunurlar. Onlardan biri Mel Qibson və Robin Murun birliyi idi, lakin onlar 28 illik evlilikdən sonra qəfil ayrılıb.

Ehtimal olunur ki, cütlüyün mübahisəsinə səbəb rejissorun qızını dünyaya gətirən rusiyalı müğənni Oksana Qriqoryeva ilə sevgi münasibəti olub.

Sonradan Hollivud tarixinin ən bahalısına çevrilən boşanma prosesi sakit, lakin çətin keçib və təxminən üç il davam edib. Cütlük uzun müddət əmlakın ədalətli bölünməsi ilə bağlı razılığa gələ bilməyiblər və bu, onların yeddi övladının olması səbəbindən xeyli çətinləşib.

Nəticədə, nikah bağlarından qurtulmaq üçün aktyor sərvətinin yarısını keçmiş həyat yoldaşına bağışlamalı olub və o zaman bu məbləğ 850 milyon dollar dəyərində qiymətləndirilib.

Robin Mur, həmçinin ömrünün sonunadək gələcək film işi üçün Qibsonun qonorarının 50 faizini alacaq.

Pul Robin üçün yeganə təzminat olmayıb: o, həmçinin rejissorun daşınmaz əmlakının bir hissəsini, o cümlədən, Kaliforniya ştatının Malibu şəhərində ümumi dəyəri 22,5 milyon dollar olan iki malikanəsini də alıb.

Kifayət qədər bahalı və uzun sürən boşanma Qibsonun rus qadını Oksana Qriqoryeva ilə romantik münasibətini davam etdirmək istəyinə təsir etməyib. Ancaq bu birlik kövrək olub: birgə qızları Lyusiya dünyaya gəldikdən bir il sonra müğənni aktyoru məişət zorakılığında günahlandırıb.

Məhkəmə zamanı Qibson üç il sınaq müddəti alıb, cüzi cərimə və uşağının anasına 750 min dollar təzminat ödəyib. Məhkəmə, həmçinin keçmiş sevgilisinin qızı ilə birlikdə yaşamağı planlaşdırdığı evin xərclərini də ödəməyi tapşırıb.

Məlumdur ki, Robin Murla pozulmuş 30 illik nikahdan sonra Qibson artıq rəsmi evlənməyib.

Paralel.az

ƏVVƏLKİ XƏBƏR

Azərbaycanın məşhur güləşçisi narkotikə görə saxlanıldı

SONRAKI XƏBƏR

Millinin baş məşqçisi: “Bu gün yaxşı oynadıq”