“TEKNOFEST Azərbaycan” festivalına hazırlıq çərçivəsində “Planer” üzrə sınaq uçuşları keçirilib

Ali məktəb tələbələrindən ibarət 19 komanda Hacıqabul aerodromunda planerlərin sonuncu sınaq uçuşunu həyata keçirib.

Trend xəbər verir ki, Türkiyə Teknoloji Takımı Vakfı (T3 Vakfı), Azərbaycan Respublikası Rəqəmsal İnkişaf və Nəqliyyat Nazirliyi və Türkiyə Respublikası Sənaye və Texnologiya Nazirliyinin birgə təşkilatçılığı ilə 26 – 29 mayda Bakıda ilk dəfə olaraq keçiriləcək “TEKNOFEST Azərbaycan” Aerokosmik və Texnologiya Festivalına hazırlıq çərçivəsində “Planer” müsabiqəsi üzrə sonuncu sınaq uçuşu baş tutub.

Qeyd edək ki, müsabiqədə Azərbaycan Milli Aviasiya Akademiyasından 12, Azərbaycan Dövlət Neft və Sənaye Universitetindən 3, Xəzər Universitetindən 2, Bakı Ali Neft Məktəbindən 1 və Azərbaycan Texniki Universitetindən 1 komanda müsabiqədə iştirak edib.

Komandalar hazırladıqları əfsanəvi “ASW 28” və “Walker Sky X8” planer modellərinin 100-150 m hündürlükdə verilən marşrut üzrə 5 dəqiqə ərzində avtonom rejimdə uçuşunu həyata keçiriblər.

Münsiflər heyəti qiymətləndirmə zamanı hava gövdəsi üçün nəzərdə tutulan avadanlıqların dizayn edilməsini, dəqiq telemetriyanı, proqramlaşdırmanı, avtonom uçuş mexanizmini, müxtəlif sensorlar və faydalı kameralar vasitəsilə müvafiq coğrafiya üzrə məlumatların toplanmasını və praktiki icrasını kritik seçim meyarları olaraq dəyərləndirəcəklər.

“TEKNOFEST Azərbaycan” festivalına vəsiqə qazanmış komandaların adları münsiflər heyəti tərəfindən 24 may tarixində elan ediləcək.

 

Qeyd edək ki, "Teknofest" mayın 26-29-da Azərbaycanda keçiriləcək.

Bakıda “Teknofest” festivalı Türkiyənin Sənaye və Texnologiyalar Nazirliyi, Türkiye Teknoloji Takımı Vakfının (T3 Vakfı) təşkilatçılığı, Azərbaycan Rəqəmsal İnkişaf və Nəqliyyat Nazirliyinin tərəfdaşlığı ilə keçirilir. Eyni zamanda Bakıda “Teknofest” in "prodakşn" ofisi fəaliyyət göstərir. Ofisin tam heyəti azərbaycanlı mütəxəssislərdən ibarətdir.

“Teknofest” tədbiri Türkiyə Respublikası Sənaye və Texnologiya Nazirliyinin və Selçuk Bayraktarın rəhbərlik etdiyi Türkiye Teknoloji Takımı Vakfının (T3 Vakfı) birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.

Məqsəd Türkiyədə aviasiya, kosmik sənaye, rəqəmsal iqtisadiyyat kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.

Trend.az

ƏVVƏLKİ XƏBƏR

Sahibə Qafarova sektor müdirinə yeni vəzifə verdi - MM-də daha bir dəyişiklik

SONRAKI XƏBƏR

Paşinyan Brüsselə yeni "əsas"la gedir: Əliyev son dəfə şans verir