Liftdən istifadə edənlərin nəzərinə: Qapılara toxunmaq, eyni anda bir neçə düyməni basmaq olmaz

“Yaşayış binalarında, eləcə də digər obyektlərdə olan liftlərdə qəzalar əsasən həddindən artıq yüklənmə halları olduqda, elektrik sistemində nasazlıq yarandıqda, həmçinin liftin quraşdırılması düzgün şəkildə yerinə yetirilmədikdə və istismar müddəti bitən mexanizmlər vaxtında dəyişdirilmədikdə baş verir. Ümumiyyətlə, liftlərin istismarı xüsusi icazələrlə həyata keçirilir, texniki baxışın həyata keçirilməsi, servis xidməti, yəni bunların hamısı xüsusi icazə sertifikatı verilimiş müəssisələr tərəfindən həyata keçirilir. Stasionar şəkildə quraşdırılan mexanizmlərdən olan kanat yolları, funiklyorlar, liftlər təhlükə potensiallı obyektlər siyahısındadırlar. Təbii ki, onların istismarı texniki təhlükəsizlik qaydalarına riayət olunmaqla həyata keçirilməlidir. Baş verə biləcək qəzaların qarşısının alınması üçün lift şaxtalarının tikintisi və liftlərin quraşdırılması zamanı dövlət standartlarına və digər texniki normativ təhlükəsizlik standartlarına cavab verən təsdiq olunmuş materiallardan istifadə olunmalıdır.”

Bunu Pravda.az-a açıqlamasında təhlükəsizlik məsələləri üzrə ekspert Elmar Nurəliyev deyib.

E.Nurəliyev təəssüflə qeyd edib ki, bəzən, ümumiyyətlə, yaşayış binalarında liftlərin texniki xidmətinə nəzarət edilmir: “Bütün liftlərin müntəzəm olaraq yoxlanılması, istismar müddəti bitmiş avadanlıqların, detallarının, mexanizmlərinin dəyişdirilməsi həyata keçirilməlidir. Liftlərə zamanında diqqət olunmazsa və baxış keçirilməzsə, qəzaların baş verməsi qaçılmaz olacaq. Bu qəzalar isə bədbəxt hadisələrə gətirib çıxara biləcək. Əlbəttə, köhnə liftlərdə olan vəziyyət ürəkaçan deyil. Liftlərdə həm qaldırıcı, həm də qoruyucu troslar olur. Bunlardan biri qırılırsa, digəri avtomatik olaraq kabini saxlayır. Köhnə liftlərdə isə bu halın baş verməsi daha təhlükəlidir. Bu da onların müasir standartlara cavab verməməsindən irəli gəlir. Ancaq yeni model liftlərdə avtomatik olaraq sürət artan kimi əyləc sistemi işə düşür və lift təhlükəsiz şəkildə dayanır”.

E.Nurəliyev, həmçinin bildirib ki, liftdən istifadə edənlər də kabinin daxilində olarkən müəyyən təhlükəsizlik qaydalarına riayət etməlidirlər: “Kabinin içərisində tavana, qapılara toxunmaq, eyni anda bir neçə düyməni basmaq olmaz. Onu da qeyd etmək lazımdır ki, yeni liftlərin içərisində quraşdırılan güzgülərdə də bir növ təhlükəsizlik üçün nəzərdə tutulur. Belə ki, bəzən lifti çağırdıqda, gəlmir və sadəcə liftin qapısı açılır insanlar isə birbaşa içəri addım ataraq şaxtaya düşə bilərlər. Liftlərdə güzgünün olması isə qapı açılan zaman insanın öz əksini orada görməsi ilə avtomatik liftin kabinəsinin gəldiyini bildirir. İstənilən yaşayış binalarında və obyektlərdə quraşdırılan liftlərin təhlükəsizliyinə cavabdeh şəxslər olur və onların borcu liftlərin təhlükəsiz şəkildə istismarına nəzarət etməkdir”.

 

Leyla Yusubova

Pravda.az

ƏVVƏLKİ XƏBƏR

Təcili yardım xidmətində zənginə cavab vermədilər, 3 NƏFƏRİ ÖLDÜRDÜ

SONRAKI XƏBƏR

Britaniyanın Ukrayna ilə bağlı AYB-dən xahişi