Konfet adı ilə narkotik maddə alan məktəblilər hadisənin təfərrüatını danışıb.

Binəqədi qəsəbəsindəki 179 saylı tam orta məktəbin qarşısında dayanmaqla 7-8-ci sinif şagirdlərinə narkotik maddəni əvvəlcə konfet adıyla pulsuz verən, onlarda asılılıq yarandıqda isə hər bir həbi 15-20 manata satan qadın bu gün həbs edilib.

Məktəblilər qadını hər gün səhər saatlarında gördüklərini bildiriblər.

Hadisə ilə bağlı məktəb rəhbərliyi danışmaqdan imtina edib.

Qeyd edək ki, məktəblilərə narkotik maddə satan qadının qeyri-rəsmi nikahdan iki yaşlı qızı da var. Görünür, 2 yaşında övladının valideynsiz böyüməsi qorxusu da onu bu işdən çəkindirə bilməyib.

Ətraflı süjetdə: 

***

Bakıda narkotik satışı ilə məşğul olan 2002-ci il təvəllüdlü Günay Quliyevanın (ad-soyad şərtidir) məhkəmə prosesi başa çatıb.

Bakı Ağır Cinayətlər Məhkəməsində hakim İradə Həsənzadənin sədrliyi ilə keçirilən prosesdə G.Quliyeva 6 il müddətinə azadlıqdan məhrum edilib.

İbtidai araşdırma orqanı tərəfindən irəli sürülən ittihama əsasən, Bakının Binəqədi rayonunda kirayə yaşayan 20 yaşlı qadın qabaqcadan əlbir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitə əldə edib saxlamaqla daşıyıb.

2021-ci ilin noyabrında daxil olan məlumat əsasında keçirilən əməliyyat nəticəsində saxlanılan qadının üzərindən 4,179 qram kustar üsulla hazırlanmış narkotik vasitə heroin, 11 ədəd həbdə təsiredici maddəsinin ümumilikdə 0,44 qram çəkidə narkotik vasitə metadon tərkibli dərman preparatları aşkar edilərək götürülüb.

Cinayət Məcəlləsinin 234.4.1.-ci və 234.4.3.-cü maddələri ilə təqsirləndirilən Günayın şagirdlərə də narkotik satdığı müəyyən edilib.

Belə ki, Günay Binəqədi qəsəbəsindəki 179 saylı tam orta məktəbin qarşısında dayanmaqla 7-8-ci sinif şagirdlərinə narkotik maddəni əvvəlcə konfet adıyla pulsuz verdiyini, onlarda asılılıq yarandıqda isə hər bir həbi 15-20 manata satdığını bildirib. O, bu səbəbdən hətta uşaqların valideynləri tərəfindən döyüldüyünü də qeyd edib. İş materiallarında təqsirləndirilən şəxsin məktəbin qarşısında narkotik vasitə dövriyyəsi ilə məşğul olması öz təsdiqini tapıb.

Qeyd edək ki, Günayın özü də narkotik aludəçisi olub. O, bir müddət əvvəl qeyri-rəsmi nikah münasibətində olduğu ərindən ayrılıb, 2020-ci il təvəllüdlü qızı var.

Mənbə: oxu.az