Sərnişin Daşımalarının Monitorinq Mərkəzi istifadəyə verilib

Rəqəmsal İnkişaf və Nəqliyyat Nazirliyinin tabeliyində fəaliyyət göstərən Azərbaycan Yerüstü Nəqliyyat Agentliyinin (AYNA) Sərnişin Daşımalarının Monitorinq Mərkəzi istifadəyə verilib.

Bu barədə "Report"a AYNA-dan bildirilib.

Məlumata görə, bu addım sərnişindaşımanın təkmilləşdirilməsi, hərəkətinin tənzimlənməsi və xidmət keyfiyyətinin yüksəldilməsi istiqamətində görülən tədbirlər çərçivəsində atılıb. Mərkəzin yaradılmasında məqsəd avtomobil nəqliyyatı ilə müntəzəm şəhərlərarası sərnişin daşımalarının həyata keçirilməsi zamanı marşrut pasportuna və sxeminə, həmçinin qüvvədə olan təhlükəsizliyə dair qayda və tələblərə riayət edilməsi vəziyyətinin monitorinqinin aparılması, tələbatın davamlı şəkildə qiymətləndirilməsidir. Müntəzəm şəhərlərarası (rayonlararası) sərnişindaşıma fəaliyyətinə nəzarət avtobuslara quraşdırılan GPS avadanlığı vasitəsilə Monitorinq Mərkəzindən həyata keçirilir. Gün ərzində xəttə çıxan avtobusların hərəkət qrafikində təyin edilmiş vaxt üzrə başlanğıc, aralıq və son məntəqələrdən hərəkətlərinə, kənar dayanacaqlarda dayanmalarına, xətdən yayınmalarına nəzarət edilir. Həmçinin avtobusların real vaxt rejimində hərəkət istiqamətləri, kəskin sürətlənməsi, tormozlaması, sürət həddini aşması və digər pozuntuların qeydiyyatı, həmçinin təhlili aparılır. Mərkəzdə avtobusların yerləşdikləri məntəqələrin koordinatları da təyin edilir.

Eyni zamanda sərnişinlərə göstərilən xidmət səviyyəsinin yüksəldilməsi və şəffaflığın təmin edilməsi məqsədilə Monitorinq Mərkəzindən respublika ərazisində fəaliyyət göstərən avtovağzal və avtostansiyalar xüsusi quraşdırılmış nəzarət kameraları vasitəsilə 24 saat monitorinq edilir.

Report.az

ƏVVƏLKİ XƏBƏR

Dünya Bankının regional direktoru Azərbaycana gələcək

SONRAKI XƏBƏR

Rusiyadan ABŞ-a CAVAB GƏLDİ - Ukraynaya hücumlar dayandırılır?