“Nə qədər yaşamağı müəyyən etmək əlimizdə deyil, bu ömür payını necə yaşamaq isə bizdən asılıdır...” , - deyən Azərbaycanın Əməkdar jurnalisti,

20 Noyabr şəhidlərindən biri, Vətənini və xalqını böyük bir məhəbbətlə sevən, uzun illər respublika mətbuatında çalışmış OSMAN MİRZƏYEVin xatirə günüdür...
Xatırlayaq.

Ruhu şad olsun.

Deyirlər ki, Osman Mirzəyev ilk uşaqlıq illərində təyyarəçi olmaq, göylərə uçmaq, uca ənginliklərə baş vurmaq arzusu ilə yaşayırdı. Bu istəyini Ulu Tanrıdan müqəddəs bir dilək kimi hamıdan gizli saxlayırdı.

Və bu gün biz onu daha çox göylərdə axtarırıq...

O, nəhs ildə, nəhs gündə dünyaya gəlmişdi - çox sevdiyi Müşfiqi, Cavidi, Əhməd Cavadı... amansız ölümün qoynuna atan 1937-ci ildə, aprelin 13-də. Ancaq özünü və başqalarını da inandırmağa çalışırdı ki, nə 13, nə də 37 onun üçün nəhs deyil. Zarafatla deyirdi ki, 13 də, 37 də bütün nəhsliklərini onun dünyaya gəldiyi günə kimi eləyib qurtarmışlar və daha nəhslik «taqətləri» qalmayıb. Və daim həyata nikbinliklə baxar, ətrafındakılara da nikbinlik aşılamağa çalışardı. Ancaq həyat ona nikbinliklə yanaşmadı…

QISA ARAYIŞ:

Osman Mirzəhüseyn oğlu Mirzəyev 1937-ci ildə Bakı anadan olub. 1961-ci ildə ADU-nun (BDU) jurnalistika fakültəsini bitirib.

Jurnalist fəaliyyətinə “Molodyoj Azerbaydjana” qəzetindən başlayaraq, «Вышка» qəzetində redaktor müavini vəzifəsinədək yüksəlib. “Əməkdar jurnalist” fəxri adına, “Qızıl qələm” mükafatına layiq görülüb.

Azərbaycan Dövlət Televiziyasında (Az.TV) ictimai-siyasi “Dalğa” televiziya verilişinin yaradıcısı və aparıcılarından olub. 1990-cı ilin avqustundan Azərbaycan Respublikası Prezidentinin Mətbuat xidmətinin rəhbəri işləyib. “Oryol v polete”, “Kaplya i ozero”, “Adlarımız”, “ Odin raz jivyem” kitablarının müəllifidir.

O.Mirzəyevin jurnalist qələmi neçə-neçə repressiya qurbanlarının adını təmizə çıxarıb, vətən yanğısı, milli cəfakeşlik hissləri aşılayıb. Azərbaycan Demokratik Respublikasının adının yasaq olduğu sovet illərində cəsarətli jurnalist Kommunist Partiyasının qəzeti səhifələrində Şərqdə ilk demokratik cümhuriyyətin dövlət xadimlərini xalqa tanıdan misilsiz araşdırma məqalələri ilə çıxış edib.

Vətənpərvər jurnalist 1988-89-cu ililərdə Moskvanın Dağlıq Qarabağ siyasəti və Xüsusi İdarə Üsulunu tənqid edərək, erməni separatçıları və onların havadarlarının məkrli əməlləri barədə xəbərdarlıq edib.

O.Mirzəyev 1991-ci il noyabrın 20-də Azərbaycanın yüksək rütbəli dövlət xadimlərini Qarabağa aparan vertolyotun göyərtəsində, Xocavənd rayonunun Qarakənd yaxınlığnda erməni qəsbkarları tərəfindən qətlə yetirilib.

Osman Mirzəyevin ölümündən bir neçə ay əvvəl çap etdirdyi “Bir dəfə yaşayırıq” kitabında belə sətirlər var: “Nə qədər yaşamağı müəyyən etmək əlimizdə deyil, bu ömür payını necə yaşamaq isə bizdən asılıdır...”

Səbail rayonunda yerləşən 190 nömrəli məktəb Osman Mirzəyevin adını daşıyır.

Osman Mirzəyev və bütün 20 Noyabr şəhidləri bu Vətən yolunda, Qarabağ uğrunda qurban getdilər.

Xalqımız onları daim ehtiramla yad edir və heç vaxt unutmayacaq.

Nurlanə Əliyeva,
Azərbaycan Jurnalistlər Birliyinin üzvü

Mənbə: buta.ws