“İşsizliyin qabağını almaq üçün mənim təşəbbüsümlə on minlərlə ödənişli ictimai iş yeri yaradılmalı idi. Ancaq əfsuslar olsun ki, biz bu proqramın icrasında çox böyük pozuntulara rast gəldik. Xüsusilə yerli icra orqanları tərəfindən vicdansızcasına bu vəsaitin talanması və ödəniş kartlarının yığılması, ondan sonra oradan pulun çəkilməsi, yaxud da öz yaxın adamlarının, bu işlərlə qohumlarının təmin edilməsi, əlbəttə ki, dözülməz faktdır və buna görə artıq bu pozuntulara yol verən şəxslər cəzalandırıldı və bu işlər davam etdiriləcək.”

“AzPolitika.info” xəbər verir ki, Prezident ilham Əliyevin 2020-ci ilin yekunlarına həsr edilən iclasda səsləndirdiyi bu fikirlər ödənişli ictimai iş yerlərilə bağlı məsələni, bunun üçün ayrılan vəsaitlərin icra orqanları tərəfindən mənimsənilməsini yenidən gündəmə gətirib.

Araşdırmaçı jurnalist Cavanşir Həsənli də özünün “feysbuk” səhifəsində paylaşdığı son statusunda bu məsələyə toxunaraq, Lənkəran rayon İcra Hakimiyyətinin "DOST İş Mərkəzi”lə bağlı mənimsəmələrə yol verdiyini iddia edib. C.Həsənli öz yazısında konkret adlara istinad edib və deyilənlərə Vergilər Nazirliyinin rəsmi saytından götürdüyü məlumatı da əlavə edib. Onun paylaşımını olduğu kimi diqqətə çatdırırıq:

“Lənkəran sakini Heydərli Babək Xeybər oğlu rayon üzrə "DOST İş Mərkəzi”ndən maaş alanlar siyahısındadır. Amma onun maaşını Lənkəranın icra başçısı Taleh Qaraşov öz cibinə qoyur. Çünki Kərgəlan kəndindən olan Babək Heydərli heç də işsiz və aztəminatlı təbəqədən deyil ki, "Dost" maaşına ehtiyacı olsun. O, ötən ilin yanvarında 6 saylı Ərazi Vergilər Baş İdarəsində qeydiyyatdan keçmiş "LƏNKƏRAN CİTY TRAVEL" Məhdud Məsuliyyətli Cəmiyyətinin sahibi və qanuni təmsilçisidir. Babək Heydərlinin anası Heydərova Nəzakət Oruc qızı isə Lənkəran icra hakimiyyəti başçısının Kərgəlan kənd inzibati ərazi dairəsi üzrə nümayəndəsidir.”

*  *  *

Məsələ ilə bağlı Lənkəran rayon İcra Hakimiyyəti mövqeyini açıqlayıb. 

İcra Hakimiyyətindən Heydərli Babək Xeybər oğlunun "DOST İş Mərkəzi”ndə işə götürülməsi ilə bağlı bildirilib ki, 1984-cü il təvəllüdlü, orta təhsilli Heydərli Babək ailəlidir, 3 azyaşlı uşağı var:

"Lənkəran Rayon Məşğulluq Mərkəzindən verilən məlumata əsasən, vətəndaş 2019-cu ilin yanvar ayında mərkəzə iş axtaran kimi müraciət etmiş və Əmək müqaviləsi bildirişləri elektron informasiya sistemində vətəndaşın vergi ödəyicisi olub-olmaması barədə məlumat aşkar edilmədiyindən 01.03.2019-cu il tarixdən “DOST İş Mərkəzi” MMC tərəfindən “sosial işçi” kimi işə götürülmüşdür.

Vətəndaş “DOST İş Mərkəzi” MMC tərəfindən işə götürülən zaman sənədləşməyə görə İcra hakimiyyəti məsuliyyət daşımır. Vətəndaşın əməkhaqqı kartı İcra başçısında olması tamamilə əsassızdır və heç bir reallığı əks etdirmir. Vətəndaş işə daxil olduğu gündən müntəzəm olaraq işinə davam etmiş və verilən tapşırıqları vaxtında icra etmişdir. Ərazidə yaşayan sakinlər bunu təsdiq edə bilər.

Eyni zamanda araşdırma nəticəsində məlum oldu ki, B.Heydərli 03 yanvar 2019-cu il tarixdə "LƏNKƏRAN CİTY TRAVEL" MMC açsa da sənədləşmə işlərini tamamlamadığı üçün bu günədək heç bir fəaliyyəti olmamışdır."

Mənbə: azpolitika.info