"Newsweek" jurnalı amerikalı sosioloq-alim Kreyq Konsidaynın Məhəmməd Peyğəmbərin (s) pandemiya və karantinlə bağlı tövsiyələrindən ibarət məqaləsini dərc edib.

İnterAz həmin yazını təqdim edir:

"COVID-19 pandemiyası hökumətləri və xəbər agentliklərini dünya əhalisinə ən doğru və faydalı məsləhətlər verməyə məcbur edir, çünki xəstəliyin miqyası həqiqətən qlobal ölçülərə çatıb. Hazırda tibb işçiləri, infeksiya və pandemiyanın təsirini öyrənən elm adamlarına da böyük tələbat var.

İmmunoloq Dr. Entoni Fauçi və tibb sahəsi üzrə müxbir Dr. Sanjay Qupta kimi mütəxəssislər, yoluxucu xəstəliklərin yayılmasının qarşısını almaq məqsədi ilə gigiyena və karantin, həmçinin təcrid olunmağın COVID-19-a qarşı ən effektiv mübarizə vasitələri olduğunu iddia edirlər.

Bilirsinizmi pandemiya zamanı gigiyena və karantini daha kim təklif edib?

1300 il əvvəl Məhəmməd peyğəmbər (s).

Ölümcül xəstəliklər mövzusunda mütəxəssis olmasa da, Məhəmməd Peyğəmbər (s) COVID-19 kimi virusların qarşısını almaq və aradan qaldırmaq üçün tövsiyələr verib.

Məhəmməd peyğəmbər (s) deyib: "Hər hansı bir ölkədə vəba xəstəliyi haqqında eşitsəniz oraya getməyin; ancaq vəba siz olduğunuz yerə yayılıbsa oranı da tərk etməyin."

"Yoluxucu xəstəlikləri olan insanlar sağlam insanlardan uzaq dayanmalıdır", o qeyd edib.

Məhəmməd peyğəmbər (s) insanları infeksiyadan qoruyacaq gigiyena qaydalarına riayət etməyə çağırıb. Məhəmməd Peyğəmbərin (s) aşağıdakı hədis və kəlamlarına nəzər salın:

"Təmizlik imanın bir hissəsidir."

"Yuxadan oyandığınız zaman əllərinizi yuyun, çünki yuxuda əllərinizlə nəyə toxunduğunuzu bilmirsiniz."

"Yeməyin neməti yeməkdən əvvəl və sonra əllərin yuyulmasıdır."

Əgər kimsə həqiqətən xəstələnibsə? Peyğəmbər əzab çəkənə nə məsləhət verə bilərdi?

O, insanları daima tibbi yardım və dərmandan istifadə etməyə çağırıb.

"Tibbi xidmətdən istifadə edin, çünki Allah dərmanı olmayan xəstəlik yaratmır, yalnız qocalığın dərmanı yoxdur".

Bəlkə də o imanı ağılla tarazlaşdıra bilib. Son həftələrdə bəziləri dua etməyin sosial məsafə və karantin kimi əsas qaydalara riayət etməkdən daha yaxşı vasitə olduğunu düşünür.

Məhəmməd peyğəmbər (s) duanın tibbdə əsas və ya yeganə forma olduğu fikrinə necə münasibət bəslərdi?

IX əsr fars alimi Əl-Tirmidxinin nəql etdiyi hekayəni oxuyun:

"Günlərin bir günü Məhəmməd Peyğəmbər (s) dəvəsini bağlamamış bədəvi görür. Bədəvidən soruşur: "Niyə dəvəni bağlamadın?" Bədəvi deyir: "Allaha güvənirəm". Cavabında peyğəmbər deyir: "Əvvəlcə dəvəni bağla, sonra Allaha təvəkkül et".

Məhəmməd peyğəmbər (s) insanları öz dinlərində hidayət axtarmağa çağırıb, lakin ümid edib ki, bütün insanlar sabitliyini, təhlükəsizliyini və rifahını təmin etmək üçün əsas tədbirləri görəcəklər.

Başqa sözlə desək insanların öz sağlam düşüncələrindən istifadə edəcəklərinə ümid edib.

Kreyq Konsidayn Rays Universitetinin Sosiologiya Bölməsinin alimidir.

O, "Məhəmmədin humanistliyi: Xristian Baxışı" (Blue Dome Press, 2020) və "Amerikadakı İslam: Problemlərin Tədqiqi" (ABC-CLIO 2019) və digər kitabların müəllifidir.

Bu yazıda müəllifin şəxsi düşüncələri əks olunub.

Mənbə: www.interaztv.com