Rusiya koronavirusun yayılmasından sonra Arktika bölgəsinin Murmansk regionununda təbii maye qazı təchizatı zavodunun tikildiyi ərazi yaxınlığında müvəqqəti xəstəxana tikməyi planlaşdırır.

Murmansk qubernatoru Andrey Çibis koronavirusun yayılmasına baxmayaraq, Rusiyanın qaz istehsalçısı`Novatek`in Belokamenkada zavodunun inşasını dayandırmadığını deyib.

Onun sözlərinə görə, Finlandiya və Norveçlə həmsərhəd olan Murmansk virusun mümkün ikinci dalğasına hazır olmalıdır.

"Biz aydın şəkildə virusun hələ uzun müddət qalma ehtimalı olduğunu başa düşürük. Biz mümkün ikinci dalğaya hazırlaşır, təxminən 700 çarpayılı, tam təchiz olunmuş müvəqqəti bir xəstəxana açırıq" - deyə, Çibis Reuters xəbər agentliyinə telefonla verdiyi müsahibəsində bildirib.

Belokamenkada xəstəxananın inşasına üçün təxminən 1 milyard rubl (14 milyon dollar) sərf ediləcəyi gözlənilir. Rəsmilər maliyyənin federal büdcədən təcili köçürmə yolu ilə çatdırılacağını bildirib.

Xəstəxananın inşası yalnız koronavirusun yayıldığı Moskvadan çox uzaq bölgələrdə sağlamlıq problemlərinin qarşısının alınması deyil, həm də dünyanın ən böyük ölkəsi üçün təbii maye qaz istehsalının əhəmiyyətini vurğulayır.

Mənbə: www.amerikaninsesi.org