Azərbaycan Memarlıq və İnşaat Universitetinin (AzMİU) Memarlıq fakültəsinin professor-müəllim heyəti və doktorantları Qazaxıstanda onlayn keçirilən beynəlxalq konfransda iştirak ediblər.
Universitetdən AZƏRTAC-a bildirilib ki, Qazaxıstan Baş Akademiyasının, Təhsil və Elm Nazirliyinin, habelə Beynəlxalq Təhsil Korporasiyasının təşkilatçılığı ilə keçirilən konfrans “Memarlıq və tikinti sahəsində müasir tendensiyalar: enerji səmərəliliyi, enerjiyə qənaət, BIM texnologiyaları, şəhər mühitinin problemləri” mövzusuna həsr olunub. Qazaxıstan Baş Akademiyasının prezidenti, texnika elmləri doktoru, akademik Əmirlan Kusainov giriş nitqi ilə çıxış edərək COVID-19 pandemiyası səbəbindən bütün dünyada yaranmış mövcud durumda xarici ölkə alimləri ilə ünsiyyət qurduqları üçün onlayn konfransın təşkilatçılarına minnətdarlığını bildirib.
AzMİU-nun Memarlıq layihələndirilməsi kafedrasının professoru, memarlıq doktoru Emir Hüseynov konfransın plenar sessiyasında “COVID-19 pandemiyası dövründə memarlıq təhsili sisteminin səfərbər edilməsi” mövzusunda məruzə ilə çıxış edib.
Mənbə: azertag.az