Türkiyənin Aksaray vilayətinin Ortaköy rayonunda həbsxanadan məzuniyyətə buraxılan 30 yaşlı Sərvət Aldırmaz polisin “dayan” əmrinə tabe olmayaraq qaçıb.
Musavat.com xəbər verir ki, 39 cinayət qeydi olduğu bildirilən Aldırmaz təqib zamanı polis avtomobili də daxil olmaqla 9 nəqliyyat vasitəsinə çırpılıb, daha sonra əlində bıçaqla polis əməkdaşlarına müqavimət göstərib.
Hadisə dünən saat 16:00 radələrində baş verib. Yol polisi əməkdaşları drift edən 68 DV 715 dövlət nömrə nişanlı avtomobilin sürücüsünə dayanmağı əmr ediblər. Lakin sürücü əmri yerinə yetirməyərək avtomobillə qaçmağa başlayıb.
Təqib zamanı Aldırmazın idarə etdiyi avtomobil bir neçə nəqliyyat vasitəsinə, o cümlədən polis maşınına çırpılıb. Ümumilikdə 9 avtomobilə ziyan dəyib.
Polis əməkdaşları sürücünü saxlamaq üçün bibər qazından istifadə ediblər. Avtomobildən düşən Aldırmaz əlindəki bıçaqla polislərə tərəf irəliləyərək müqavimət göstərib. Daha sonra yenidən maşınına minən sürücü polis əməkdaşlarının avtomobilinin təkərlərinə atəş açıb.
Hadisə ərazidəki müəssisələrdən birinin təhlükəsizlik kameralarına düşüb. Görüntülərdə sürücünün qaçışı, avtomobillərlə toqquşması və polis əməkdaşlarına bıçaqla müqavimət göstərməsi əks olunub.
Əraziyə əlavə polis qüvvələri cəlb edildikdən sonra Aldırmaz saxlanılıb. O, dayanma əmrinə tabe olmamaq, sərxoş vəziyyətdə avtomobil idarə etmək və drift etmək səbəbilə ümumilikdə 365 min Türkiyə lirəsi məbləğində cərimələnib. Sürücülük vəsiqəsi də müsadirə olunub.
Polis bölməsindəki prosedurlardan sonra məhkəməyə çıxarılan Aldırmaz barəsində həbs qətimkan tədbiri seçilib. Onun 39 cinayət qeydinin olduğu müəyyənləşdirilib və hadisədən sonra yenidən həbsxanaya göndərilib.
Mənbə: musavat.com
scorpion.az