Polis şöbəsinin yanında narkotik əkən şəxs: “Bu işi mənə rəis təklif edib”

İsmayıllıda qonşusu ilə əlbir olub narkotik bitkilərin qanunsuz əkib-becərməklə məşğul olan ata və oğul bu işi etməkdə onlara polis əməkdaşının da kömək etdiyini bildirib və hadisənin təfərrüatlarını danışıblar.

“Kriminalqafqaz” məhkəmə materiallarına istinadən məlumat verir ki, Eşqin Hüseynov (soyad şərtidir) 2018-ci ildə meşədən topladığı yabanı çətənə bitkisinin toxumlarını özündə saxlayıb. 2020-ci ildə isə həmin toxumları rayonun Diyallı kəndindəki boş sahədə əkib. Bu işdə ona atası Vüqar və qonşusu Əlmurad da kömək edib. Onlar birlikdə boş torpaq sahəsindəki kol-kosu təmizləyərək həmin əraziyə narkotik tərkibli bitki əkiblər.

Təqsirləndirilən Eşqin Hüseynov öz ifadəsində bildirib ki, ona narkotik bitkilərin əkməsi təklifini İsmayıllı rayon Polis Şöbəsində sahə rəisi işləyən Mahir Nuralıyev edib: “Atamın bu işdə heç bir təqsiri yoxdur. İsmayıllı rayon Polis Şöbəsində sahə rəisi işləyən Mahir Nuralıyev mənə dedi ki, rəhbərlikdən ona etibar olunur və ortaq şəkildə narkotik tərkibli bitliklər əkə bilərik. Şərtə görə sonda ona 5000 manat pul verməli idim. Əvvəlcə onunla razılaşmadım. Amma sonra düşündüm ki, müalicəm üçün pul lazımdır. 2020-ci ilin martında Mahir mənə 300 manat verdi. Həmin pulun 270 manatını kabel, gübrə və motor almaq üçün, 30 manatını isə kafedə xərclədim. Həmin vaxt Mahir mənə toxum da verdi. Həmin toxumlardan 1000 ədədini yetişdirdim. Elə əkəcəyim torpağın yerini də Mahir mənə göstərdi. Düz polis şöbəsinin yanında yerləşən boş torpaq sahəsi idi. Həmin ərazini təmizləyib toxumları əkəndən sonra onları suvarmaq üçün kömək edəcək adam da lazım idi. Qonşum Əlmuraddan kömək istədim. Ona da dedim ki, işin əvəzində 1500-2000 manat pul verəcəm. Əlmurad da əvvəlcə razı olmadı. Sonra ona dedim ki, bu işdə Mahir də var. Ondan sonra razılaşdı”.

Məhkəmə iclasında ifadə verən İsmayıllı rayon Polis Şöbəsinin sahə rəisi Mahir Nurəliyev bildirib ki, onun bu işdə iştirakı olmayıb: “Eşqinin tutulması barədə xəbəri televizorda gördüm. Eşqini əvvəlcədən tanıyırdım. Onunla telefonda danışıb, birlikdə çay içmişik. Münasibətimiz də yaxşı idi. Amma Eşqinə narkotik tərkibli çətənə bitkilərinin əkilməsi barədə heç bir söz deməmişəm. O həbs olandan sonra atası Vüqarla görüşdük və məndən xahiş etdi ki, Eşqinə kömək edim. Mən də Vüqara bildirdim ki, oğluna heç cürə kömək edə bilmərəm. O da məsuliyyətdən yayınmaq üçün öz ifadəsində mənim barəmdə belə sözlər deyib”.

Eqşinin atası da öz ifadəsində oğlunun sözlərini təsdiqləyərək bildirib ki, bu işlə bağlılığı olmayıb: “Mən kənddə fermada işləyirəm. 2020-ci ilin aprelində oğlum Eşqin mənə dedi ki, fermanın yaxınlığındakı meşəlik ərazidə narkotik vasitə olan çətənə bitkiləri əkib-becərəcək. Eşqin narkotik vasitə istifadəçisi olduğundan buna heç bir etiraz etmədim. Amma onun bəhs etdiyi əraziyə də getməmişəm. Oğlum mənə dedi ki, ona su matoru və işıq çəkmək üçün kabel lazımdır. Mən də onları alıb verdim. Bu işdə ona Əlmurad köməklik edib. Mənim heç nədən xəbərim olmayıb”.

Məhkəmə iclasında ifadə verən Əlmurad Məmmədov (soyad şərtidir) Eşqinin sözlərini təsdiqləyib. O, bildirib ki, Eşqinin atası Vüqarın bu məsələdən xəbəri yoxdur: "Pula ehtyacım olduğu üçün bu işi görmüşəm. Bağa baxmaq və oranı suvarmaq üçün 250 manat pul almışam. Eşqin bu işi mənə təklif edəndə əvvəlcə razılaşmamışdım, sonra razılaşdım. Səbəb xəstə olduğumdan pula olan ehtiyacım idi. Həm də Eşqin məni əmin etdi ki, əkmə işlərini özü edəcək. Mən sadəcə suvaracam. Vüqara gəldikdə isə, onun bu işdə əli olmayıb. Hətta Eşqinlə mən əraziyə gedib baxdıq, amma Vüqar bizimlə gəlmədi”.

Şəki Ağır Cinayətlər Məcəlləsinin hökmü ilə təqsirləndirilən Eşqin Hüseynov 6 il, atası Vüqar Hüseynov 4 il, Əlmurad Məmmədov isə 5 il müddətə azadlıqdan məhrum edilib.

Nuh.az

ƏVVƏLKİ XƏBƏR

“Taliban” liderlərinin maaşı və Əfqanıstandakı minimum əməkhaqqı

SONRAKI XƏBƏR

Xərçəng riskini artıran hallar məlum oldu