ABŞ-da yaşayan azərbaycanlı MMA üzrə beynəlxalq turnirdə finala çıxıb

ABŞ-da yaşayan həmyerlimiz Nazim Sadıqov qarışıq döyüş növləri (MMA) üzrə beynəlxalq turnirdə qalib gəlib.

"Report"un yerli bürosu xəbər verir ki, 27 yaşlı peşəkar döyüşçü ABŞ-ın Texsas ştatının Hyuston şəhərində UFC-yə giriş ("UFC Fight Pass") çərçivəsində keçirilən döyüşdə qalib gələrək finala vəsiqə qazanıb.

O, yarışın üçüncü raundunun son dəqiqələrində boğucu fəndlə amerikalı idmançı Con Herreranı məğlub edib. N.Sadıqov qalibiyyətini döyüş qəfəsində üç rəngli bayrağımızla dalğalandıraraq qeyd edib.

N.Sadıqov “Report”un yerli bürosuna müsahibəsində UFC-yə girişi hədəflədiyini və yaxın günlərdə müəyyənləşəcək son döyüşün onun ən böyük xəyalını reallaşdıracağını deyib: "Uşaq yaşlarımdan idmanın müxtəlif növləri ilə məşğul olmuşam. Artıq bir neçə ildir, özümü qarışıq idman növlərində sınayıram. Qələbələrim çoxdur, bütün uğurlarımı Azərbaycana həsr edirəm.

ABŞ-da doğulub boya başa çatsam da, Azərbaycan doğma Vətənimdir. Bundan sonra da, qatıldığım bütün yarışlarda Azərbaycan bayrağını zirvələrə qardırmağı hədəfləyəcəm".

Vüsalə Abbasova

Report.az

ƏVVƏLKİ XƏBƏR

İran rəsmisi: “Azərbaycandan yaxşı mesajlar aldıq”

SONRAKI XƏBƏR

Qarabağın turizm potensialı qiymətləndiriləcək