ONE FC üzrə çempion Çingiz Allazov Bakıda təşkil edilən mətbuat konfransında iştirak edib.

“Qafqazinfo” xəbər verir ki, “One Championship” Dünya Qran Prisinin qalibi və yüngül çəkidə mütləq çempion olan azərbaycanlı kikboksçusu Bakıda təşkil edilən mətbuat konfransında ermənistanlı idmançı Marat Qriqoryanla döyüşmək arzusunda olduğunu söyləyib.

İdmançı Vətəndə olduğu üçün özünü xoşbəxt hiss etdiyini deyib:

“Bakıda 3 dəfə olmuşam. Dörd il idir ki, məşqlərlə əlaqədar buraya gələ bilmirdim. Vətəndə olmağa hər zaman şadam. Döyüşdən əvvəl həm burada, həm də Belarusda mənə çox dəstək verdilər. Buna görə, xalqıma minnətdaram. Onların sayəsində dünya reytinqində bir nömrəyəm. İnkişaf etməliyik, qələbələrin davamı gəlməlidir”.

Çingiz Allazov bu idman növünün Azərbaycandakı hazırkı durumuna da münasibət bildirib: “Azərbaycanda peşəkar kikboks yox dərəcəsindədir. Bunun üçün peşəkar hazırlıq məkanları olmalıdır. Peşəkar kikboks dünyada çox inkişaf edib. Hazırda bu idman növünü milyonlar izləyir”.

Tanınmış idmançı Azərbaycan vətəndaşlığını almaq üçün müraciət edəcəyini bildirib.

Mənbə: olke.az