“Rəşad, karyeranı bitir, milliyə məşqçi gəl” – Ramil Şeydayev + Video

“Rəşad, karyeranı bitir, milliyə məşqçi gəl” – Ramil Şeydayev + Video

“Sabah”ın yeni transferi Ramil Şeydayev milli komandamızın yeni baş məşqçisi ilə bağlı müzakirələrə qoşulub.

Qol.az xəbər verir ki, İTV-də yayımlanan “Bol idman” verilişində millimizin 23 yaşlı hücumçusu bu məsələyə münasibətini açıqlayıb. “Baş məşqçi kimi görmək istəyirsiniz” sualına cavabında Şeydayev deyib:

“Mənim üçün geniş mənada millinin baş məşqçisinin kim olacağı önəmli deyil. Mənim işim oynamaqdır. Uğur qazanmaq üçün çox şey məşqçidən asılıdır. Amma ona da yaxşı material lazımdır. Əgər hamımız millinin oyununa yüz faiz köklənə bilsək, məşqçi üçün də rahat olar”.

R.Şeydayev daha sonra qeyd edib ki, əgər ondan asılı olsa, millidə “Qarabağ”ın kapitanı Rəşad Sadıqovu məşqçi görmək istəyər: “Rəşad karyeranı bitir, milliyə gəl (gülür)... Mən onu millidə görmək istəyərəm. İnanıram ki, bu iş gələcəkdə onda alınar. Mən onunla millidə və “Qarabağ”da oynamışam. Onun məşqçi kimi üstünlüyü müasir futbola yanaşmasıdır. Azərbaycanda bir çox məşqçi köhnə dövrdə oynayıb. Onlar üçün indi çətindir. Rəşad isə gənc məşqçidir, komandasına müasir futbolu oynada bilər. Şəxsi fikrim belədir ki, o, yaxşı mütəxəssis ola bilər. Çoxları düşünür ki, onun millidə komandalarda təcrübəsi yoxdur. Əgər hətta indi gəlsə - düzdür, indi gələ bilməz, çünki oynayır – amma 2 il sonra gəlsə, onda yaxşı alınar”.

Qeyd edək ki, verilişdə R.Şeydayevin “Sabah”a transferindən də danışılıb.

Verilişin millinin baş məşqçi məsələsi ilə bağlı hisssəsinə isə aşağıda təqdim olunan videonun 34.35-ci dəqiqəsindən başlayaraq 39.00-cı dəqiqəyə qədər olan hissəsində baxa bilərsiniz.

Mənbə: qol.az