ITU-nun baş katibi vəzifəsinə azərbaycanlının namizədliyi irəli sürülüb

Beynəlxalq Telekommunikasiya İttifaqının (International Telecommunication Union – ITU) baş katibi vəzifəsinə Rusiyanın "VimpelCom" şirkətinin ("Beeline" ticarət nişanmı) prezidenti, əslən azərbaycanlı Rəşid İsmayılovun namizədliyi irəli sürülüb. Regional Rabitə Birliyindən (RRB) "APA-Economics"ə verilən məlumata görə, bu barədə Rusiyanın Rəqəmsal İnkişaf, Rabitə və Kütləvi İnformasiya Vasitələrinin Rabitə sahəsində dövlət siyasəti departamentinin direktoru Andrey Kantsurov RRB-nin Radiotezlik spektri və peyk orbitlərinin istifadəsinin tənzimlənməsi üzrə Komissiyanın 19-cu iclası zamanı deyib.

Onun sözlərinə görə, seçkilər ITU-nun 2022-ci ildə keçiriləcək Səlahiyyətli Konfrans zamanı baş tutacaq.

A. Kantsurov RRB-nin rabitə administrasiyalarından rusiyalı namizədi dəstəkləmələrini xahiş edib.

Qeyd edək ki, Komissiyanın iclasında Azərbaycan, Belarus, Qazaxıstan, Qırğızıstan, Türkmənistan, Özbəkistan, Monqolustan, Rusiya və Ermənistanın rabitə administrasiyalarının səlahiyyətliləri, eləcə də ITU-nun Radiorabitə Bürosunun, RRB İcraiyyə komitəsinin və digər qurumların 80-dən çox nümayəndəsi iştirak edib.

Xatırladaq ki, R. İsmayılov 2 noyabr 1965-ci ildə Bakıda anadan olub. O, Lomonosov adına Moskva Dövlət Universitetinin tarix və Moskva Dövlət Politexnik Universitetinin İqtisadiyyat və idarəetmə fakültələrini bitirib. 2014-cü ildən 2018-ci ilədək rabitə nazirinin müavini olub, daha sonra Rusiyada "Nokia" şirkətinin baş direktoru vəzifəsində çalışıb. 2019-cu ildən etibarən Runet Davamlı İstismar Qanunu çərçivəsində trafik filtrləmə sistemlərini tətbiq edən “Məlumatların İşlənməsi və Avtomatlaşdırılması Mərkəzi”nə rəhbərlik edib.

Hazırda R. İsmayılov "VimpelCom"un prezidenti vəzifəsində çalışır.

Apa.az

ƏVVƏLKİ XƏBƏR

Kəlbəcərdəki qızıl yatağına gedən yol açılmadı – Rusiya şirkətindən XƏBƏRDARLIQ

SONRAKI XƏBƏR

2021-ci ildə yaşa görə nə qədər insan pensiya alıb?