Naxçıvanın mədəni-təbii bitkilər altındakı torpaqlarının ekoloji qiymətləndirilməsi aparılıb

Naxçıvanın mədəni-təbii bitkilər altındakı torpaqlarının ekoloji qiymətləndirilməsi aparılıb

Naxçıvan, 24 sentyabr, AZƏRTAC

AMEA Naxçıvan Bölməsinin Bioresurslar İnstitutunun Torpaq ehtiyatları laboratoriyasında elmi-tədqiqat işləri aparılır.

Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, elmi-tədqiqat işləri 2003-cü ildən bu tərəfə ardıcıl olaraq davam etdirilir. Bu barədə danışan laboratoriyanın rəhbəri, aqrar elmlər üzrə fəlsəfə doktoru, dosent Sahib Hacıyev bildirib ki, ötən illərdə Naxçıvan Muxtar Respublikasının ərazisindəki torpaqların tip, yarımtip və növ müxtəliflikləri elmi əsaslarla öyrənilib.

Alim qeyd edib ki, ölkədə aqrar sektoru inkişaf etdirmək məqsədilə irimiqyaslı Dövlət proqramları həyata keçirilir, bir sıra vacib sərəncamlar imzalanıb, icra edilib. Həmin dövlət sənədləri torpaq ehtiyatları laboratoriyası qarşısında da vəzifələr qoyub. Belə ki, regionda aqrar sektorda yeni-yeni nailiyyətlər əldə etmək üçün əsas məsələlərdən biri də müasir dövrün tələblərinə cavab verən yeni metodların tətbiqi ilə yanaşı, torpaqlardan səmərəli istifadə olunmasıdır. Məhz bu baxımdan meyvəçiliyin və tərəvəzçiliyin inkişaf etdirilməsi torpaqların potensial imkanlarının müəyyənləşdirilməsində ərazinin fiziki-coğrafi şəraitinin öyrənilməsi, torpaqların qiymətləndirilməsi, aqroistehsalat qruplaşdırılması və münbitlik modellərinin qurulması vacib məsələ kimi qarşıda durur.

“Torpaq ehtiyatlarından səmərəli istifadə etmək üçün yeni metodların köməyi ilə region torpaqlarının elmi əsaslarla öyrənilməsi məqsədi ilə müəyyən edilən istiqamətlərdə 200-ə yaxın ekspedisiyalara gedilib. Muxtar respublikanın düzənlik, orta dağlıq və dağlıq ərazilərindən torpaq, bitki nümunələri götürülüb”, - deyən Sahib Hacıyev qeyd edib ki, aparılan tədqiqatlar əsasında ərazinin təbii, xüsusilə mədəni bitkilərə yararlı torpaqların konkret olaraq ümumi sahəsi müəyyənləşdirilib, orta məhsuldarlığı və qiymət balları hesablanıb. Müəyyən olunan sahələrdən götürülən 500-dən çox torpaq nümunəsi Naxçıvan Muxtar Respublikası Kənd Təsərrüfatı Nazirliyinin Akademik Həsən Əliyev adına “Araz” Elm İstehsalat Birliyinin laboratoriyasında analiz olunub.

Laboratoriya rəhbərinin sözlərinə görə, alınan analizlərin nəticələri təhlil olunaraq muxtar respublikanın inzibati rayonlarının mədəni-təbii bitkiləri altındakı torpaqlarının ekoloji qiymətləndirilməsi, o cümlədən aqroistehsalat qruplaşdırılması aparılıb. Ərazidə torpaqlardan daha səmərəli istifadə olunması üçün relyef şəraiti nəzərə alınmaqla Naxçıvan Muxtar Respublikasının torpaq xəritəsi tərtib olunub, tədqiqatlarda ərazinin fiziki-coğrafi şəraiti öyrənilməklə torpaq-kadastr rayon və yarımrayonlarının xəritə-sxemi çəkilib.

Alim rəhbərlik etdiyi laboratoriyada elmi-tədqiqat işlərinin nəticəsində toplanmış materiallar əsasında 100-dən çox cədvəlin tərtib olunduğunu, 30-a qədər süxur, 100-ə qədər torpaq nümunələrinin nömrələnərək qeydiyyata alındığını bildirib.

Sahib Hacıyev vurğulayıb ki, laboratoriyada aparılan elmi tədqiqatların nəticələri əsasında 6 monoqrafiya, 2 metodik vəsait, 5 tövsiyə, 2 xəritə, 7 xəritə-sxemi olmaqla, ümumilikdə, 130-dan çox elmi əsər işıq üzü görüb. Əsərlərdən 30-dan çoxu xaricdə nəşr olunub.

Son dövrlərdə dünyada baş verən səhralaşma - torpaq deqradasiya prosesləri ölkəmizin, o cümlədən muxtar respublikanın torpaq mühitinə də öz təsirini göstərdiyini bildirən alim qeyd edib ki, rəhbərlik etdiyi laboratoriyanın 2021-2025-ci illərdə aparılacaq tədqiqat işlərinin mövzusunun bu istiqamətə yönəldilməsi nəzərdə tutulub.

 

Mənbə: azertag.az