Bakı. Ləman Zeynalova, Orxan Nəbiyev - Trend:
Trans-Adriatik boru kəməri (TAP) konsorsiumu layihənin illik buraxılış gücünün genişləndirilməsi ilə bağlı uzunmüddətli dayanıqlı tələb olacağı təqdirdə bu məsələnin iqtisadi və texniki baxımdan reallaşdırılmasını nəzərdən keçirə bilər.
Bunu Trend-ə TAP-ın icraçı direktoru Luka Skyeppati deyib.
O bildirib ki, boru kəmərinin ildə 20 milyard kubmetr nəql gücünədək genişləndirilməsi bazar sınaqlarının yekunlarına əsasən müəyyənləşir:
"TAP ildə 20 milyard kubmetr buraxılış gücü nəzərə alınaraq layihələndirilib. Tikinti başlayanadək TAP üçün yaradılan kommersiya və normativ-hüquqi baza ilkin mərhələdə 10 milyard kubmetr nəql gücünə əsaslanmışdı. Layihə əlavə kompressorların quraşdırılması hesabına buraxılış gücünün mərhələli şəkildə ildə 20 milyard kubmetrədək genişlənməsini nəzərdə tutur".
Mənbə: az.trend.az