Çilinin Azərbaycandakı səfirliyinin müvəqqəti işlər vəkili ilə keçirilən görüşdə iki ölkənin biznes dairələri arasında əməkdaşlığın genişləndirilməsi imkanları müzakirə edilib.
Bu barədə İxracın və İnvestisiyaların Təşviqi Agentliyi – AZPROMO məlumat yayıb.
Belə ki, AZPROMO-da Çilinin Azərbaycandakı səfirliyinin müvəqqəti işlər vəkili Xuan Karlos Salazar Alvares ilə görüş keçirilib.
Görüş zamanı AZPROMO-nun icraçı direktorunun müavini Tural Hacılı Agentliyin fəaliyyəti, ölkəmizin biznes və investisiya mühiti, eləcə də bu ilin sentyabr ayında keçirilməsi planlaşdırılan 2-ci Azərbaycan Beynəlxalq İnvestisiya Forumu barədə məlumat verib. Tərəflər arasında Çili şirkətlərinin və aidiyyəti qurumların forumda iştirakının təmin edilməsi ilə bağlı razılıq əldə olunub.
Görüşdə həmçinin Azərbaycan və Çili arasında iqtisadi-ticarət əlaqələrinin inkişaf perspektivləri, eləcə də qarşılıqlı maraq doğuran prioritet istiqamətlər ətrafında fikir mübadiləsi aparılıb. İki ölkənin biznes dairələri arasında əlaqələrin genişləndirilməsi və gələcək birgə təşəbbüslərin reallaşdırılması imkanları müzakirə olunub.
Mənbə: az.trend.az
scorpion.az