Nazir: "Həssas qrupa aid olan şəxslərə dəstəklə bağlı çatışmazlıqlar var"

"Həssas qrupa aid olan şəxslərə dəstəklə bağlı müəyyən çatışmazlıqlar yenə də var. Bunları aradan qaldırmaq üçün müxtəlif alətlər birgə icra edilməlidir".

"Report" xəbər verir ki, bunu əmək və əhalinin sosial müdafiəsi naziri Sahil Babayev deyib.

Onun sözlərinə görə, həssas qruplarla bağlı həyata keçirilən layihələr birdəfəlik yox, davamlı iş yerlərinə qədər gedib çıxan olmalıdır: "Həmin şəxslərin əlini çörəyə çatdıraq ki, özü qazansın, öz rifahını özü təmin edə bilsin. Bu sahədə maarifləndirməni də genişləndirmək lazımdır. Biz dövlət qurumları olaraq öz işlərimizi görürük. Sahibkarlar da bu sahədə öz üzərinə düşəni icra etməlidir".

S.Babayev qeyd edib ki, istedadlı əlillərin əl işi üçün elektron portal yaradılacaq: "Həmin əl işlərinin satışı üçün də imkan yaradılacaq. Həssas qruplarla bağlı görüləcək işlər əlaqəli olmalıdır. Çalışmaq lazımdır ki, sosial dəstək layihələri ədalətli bölünsün. Bəzən məlumat boşluğu olanda, tam koordinasiya olmayanda bir ailəyə, bir şəxsə üç ayrı qurum dəstək göstərir, ancaq eyni vəziyyətdə olan digər ailəyə heç kim dəstək göstərmir. Ona görə də əlaqələndirmənin düzgün qurumları, ümumi məlumata bazasının yaradılması önəmli idi. Artıq belə baza var. 2020-2021-ci ildə dəstək göstərilən 300 min şəxsin siyahısı həmin bazada var. Çatışmazlıqlar yenə də var. Bunu aradan qaldırmaq üçün müxtəlif alətləri birgə icra etmək qarşıda duran əsas hədəflərdəndir".

Report.az

ƏVVƏLKİ XƏBƏR

“JARA-2022” necə olacaq? Artistlərin sayı və adları açıqlandı - VİDEO

SONRAKI XƏBƏR

Məktəb direktorunun səs yazısı yayıldı: “Başına oyun açacam” - VİDEO