Yellen: "G7" ölkələri Rusiya neftilə bağlı razılığa gələ bilmirlər

Yellen: "G7" ölkələri Rusiya neftilə bağlı razılığa gələ bilmirlər<span class="qirmizi"></span>

Yeddilik (G7) ölkələrinin maliyyə nazirləri və mərkəzi bank rəhbərləri cümə axşamı günü Rusiya neftinin idxalına qoyulan potensial məhdudiyyətlərin mahiyyəti ilə bağlı konsensusa gələ bilmədilər.

Bizimyol.info xəbər verir ki, bu barədə jurnalistlərə ABŞ-ın maliyyə naziri Canet Yellen Bonn yaxınlığındakı Köniqsvinter şəhərindəki Petersberq mehmanxanasında keçirilən ikigünlük görüşün birinci gününün yekunlarına əsasən bildirib.

Onun sözlərinə görə, Amerika tərəfi Rusiyadan enerji nəqlinin həcmini saxlamaqla, Moskvanın gəlirlərini məhdudlaşdırmaq üçün Rusiya neftinin idxalına rüsumların tətbiqi təklifi irəli sürüb. Eyni zamanda, Avropa ölkələrinin nümayəndələri ilin sonuna qədər mərhələli embarqonun tətbiqinə çalışırdılar. Yellenin sözlərinə görə, Rusiya neftinin alıcıları müəyyən həddi aşan qiymətlərlə qara qızılı almayacaqları barədə razılığa gələ bilərlər. O, inanır ki, mümkün qədər çox ölkə ona qoşularsa, belə bir təşəbbüs uğurlu olar: "Heç nə açıq-aydın strategiya kimi kristallaşmayıb", - deyə nazir bildirib.

Yellen görüşün ilk günündə Rusiyanın Avropaya neft ixracından əldə etdiyi gəlirlərin azaldılması mexanizmlərinin az müzakirə olunduğunu, lakin bu təklifə marağın böyük olduğunu vurğulayıb.

Bundan əvvəl, "Böyük yeddilik" ölkələrinin Ukraynaya 18,4 milyard dollar məbləğində maliyyə yardımı göstərmək qərarına gəldiyini bildirib. Amerikalı nazir bu rəqəmi təsdiqləməkdən imtina edib, lakin ayrılan vəsaitin həcminin 15 milyard dolları keçdiyini vurğulayıb.

Avropa Komissiyasının (AK) Rusiyaya qarşı təklif etdiyi altıncı sanksiyalar paketinə təxirə salınmış neft embarqosu layihəsi daxildir: Paketin qüvvəyə minməsindən altı ay sonra Rusiyadan xam neftin idxalına, 2023-cü ildən isə neft məhsullarının idxalına qadağa qoyulması təklif edilir. Eyni zamanda, AK Macarıstan və Slovakiyaya 2024-cü ilin sonuna qədər Rusiya neftini almağa icazə verməyi təklif edib. Mənbələrin bildirdiyinə görə, Avropa Komissiyası artıq neft embarqosunun vaxtı, parametrləri və mümkün istisnalarla bağlı bir sıra təkliflərini yumşaltmalı olub.

Macarıstan neft embarqosuna qarşı çıxır və bu tədbirin vuracağı ziyanın Avropa üçün fəlakətli olacağına inanan bir sıra digər ölkələrin dəstəyi ilə çıxış edir.

Qadir, Bizimyol.info

Mənbə: www.bizimyol.info