Sumqayıtda qaz olmayan ərazilərə xətlərin çəkiləcəyi vaxt AÇIQLANDI

Texnologiyalar Parkı adlanan ərazinin sakinləri mavi yanacaq üzünə həsrət qalıblar. Sözügedən ərazi Sumqayıt şəhərinin şimalında, Hacı Zeynalabdin qəsəbəsindədir.

Xeberle.com-un məlumatına görə, odunla qızınan sakinlər mavi yanacağın veriləcəyi günü səbirsizliklə gözləyirlər.

Burada məişətdə istifadə üçün qaz balonu, evi isitmək üçün isə odun sobası istifadə edirlər. Zavod ərazisinin sakinlərinin illərlə davam etdiyi bu yaşam tərzi onlara maddi baxımdan da əlverişli deyil.

Məsələ ilə bağlı "Azəriqaz" İB-dən Xeberle.com-a bildirilib ki, mühafizə zonalarında qaz xətlərinin çəkilməsi təhlükəsizlik baxımından qadağandır. "Azəriqaz" İB qanuna zidd olaraq bunu həyata keçirə bilməz. Digər kommunal xidmətlər elə də təhlükəli olmadığından istənilən yerə çəkilə bilər və buna müvafiq orqanlar cavabdehdir. Sabah hər hansı bir hadisə baş verdikdə məsuliyyəti təchizatçı daşıyacaq.

Əvvəllər müxtəlif üsullarla bəzi ərazilərə qanunsuz qaz, işıq, su çəkilməsinə, ana xətlərə kənar müdaxilələrə göz yumulurdu, 2015-ci ildən etibarən belə hallara yol verilmir.

Qanunsuz tikililər, özbaşına salınmış məhəllələr də dövlət qeydiyyatına alındıqdan və baş plana salındıqdan sonra onlara kommunal xidmətlərin çəkilməsi mümkündür.

Qazlaşdırma prosesi də mərhələlilik prinsipinə uyğun həyata keçirilir. Bu il 114 yaşayış massivi qazlaşdırılıb, gələn il isə 140 yaşayış məntəqəsinə qaz çəkilməsi nəzərdə tutulur. Hər hansı bir əraziyə qaz çəkilməsi üçün ərazi icra orqanları bu işi ərazinin planına uyğunlaşdırıb müvafiq idarəyə müraciət etməlidir. Əgər təhlükəsizlik şərtləri uyğundursa və mühafizə zonalarına daxil deyilsə ərazi plana salınır və növbəsi çatdıqda qazlaşdırılır.

Kommunal məsələlər üzrə ekspert Elçin Bayramlı Xeberle.com-a bildirib ki, "Azəriqaz" İB-nin yaşayış üçün statusu olmayan ərzilərdə qanunsuz tikilən evlərə hüquqi cəhətdən mavi qaz vermək imkanı yoxdur. Ona görə də ərazi üzrə icra orqanları, bələdiyyələr "Azəriqaz" İB-yə müraciət etməlidirlər. Qazlaşdırma layihəsi plana salınmalıdır. "Azəriqaz" İB satıcı şirkətdir . Plana salınma icra orqanları tərəfindən həyata keçirilir. Vətəndaşlar birbaşa "Azəriqaz" İB-yə müraciət etməməlidir, çünki bu qurumun vətəndaşın müraciəti ilə qaz çəkmə hüququ yoxdur. Konkret desək, Sumqayıt Şəhər İcra Hakimiyyət aidiyyəti üzrə müraciət edib ərazinin qazlaşdırılmasını layihəyə salmalıdır. Yalnız bundan sonra növbəli və mərhələli şəkildə müvafiq layihə əsasında bütün ərazilər qazlaşdırılacaq.

Xədicə Səxavətqızı

Xeberle.com

Xeberle.com

ƏVVƏLKİ XƏBƏR

Rusiya İrandan dronlar və ballistik raketlər sifariş edib – DPA

SONRAKI XƏBƏR

“Hələ istifadəyə yararlıyıq” - Xainlər ağalarının gözünə girmək üçün nə etdi?