Polşa-Rusiya sərhədində izləmə sistemləri olan səddin tikintisinə mart ayında başlanacaq.

"Unikal" xəbər verir ki, bu barədə Polşa Mətbuat Agentliyinə Polşa Sərhəd Mühafizəsinin mətbuat katibi Anna Mixalska məlumat verib.

Onun sözlərinə görə, hazırda podratçı layihə hazırlayır və bu layihəni sərhəd xidməti təsdiq etməlidir. Agentlik Mixalskayanın sözlərindən sitat gətirib: "Şlaqbaumun quraşdırılmasına bu ilin martında başlanmalıdır".

Şlaqbaum sərhədin 200 km-ni əhatə edəcək və sərhəddə vəziyyətə gecə-gündüz nəzarət etməyə imkan verən sensorlar və kameralar sistemi olacaq. Layihənin dəyəri 82 milyon dollar qiymətləndirilir.

Noyabrın əvvəlində Polşa Rusiya Federasiyasının Kalininqrad vilayəti ilə sərhəddə müvəqqəti tikanlı məftillərin tikintisinə başlayıb. Varşavada qeyd edildiyi kimi, bu qərar Rusiyanın Kalininqrad vilayətinin hava limanını Yaxın Şərq və Şimali Afrikadan gələn təyyarələr üçün açması ilə əlaqədar qəbul edilib ki, bu da miqrasiya təzyiqi təhlükəsi yaradır.

Polşa-Belarus sərhədindəki miqrasiya böhranı ilə əlaqədar Polşa 2022-ci ilin yanvarında bu hissədə ümumi uzunluğu 186 km olan yeni maneənin tikintisinə başlayıb. Hündürlüyü 5,5 m-ə çatır və kameralar və hərəkət sensorları da daxil olmaqla müasir müşahidə avadanlığı ilə təchiz olunub. Ölkənin Belarusla sərhədinin ümumi uzunluğu 418 km, Rusiya ilə quru sərhədi isə 210 km-dir.

Mənbə: www.unikal.org