Azərbaycan alimlərin kitabı gürcü dilində nəşr edilib

Azərbaycan alimlərin kitabı gürcü dilində nəşr edilib

Tbilisi, 22 yanvar, AZƏRTAC

Azərbaycan alimlərinin kitabı gürcü dilində nəşr olunub.

AZƏRTAC xəbər verir ki, iqtisad elmləri doktoru, professor, Əməkdar kənd təsərrüfatı işçisi İslam İbrahimovun və iqtisad elmləri namizədi Aqil Qurbanovun birgə hazırladıqları “Aqrar sahənin prioritet istiqamətləri” adlı monoqrafiya Tbilisidə gürcü dilində çapdan çıxıb.

Yeddi fəsildən ibarət monoqrafiyada aqrar iqtisadiyyatın mahiyyəti, qanunauyğunluqları, xalq təsərrüfatında rolu, yeni iqtisadi münasibətlərin formalaşdırıldığı və ərzaq təhlükəsizliyinin qloballaşdığı şəraitdə iqtisadi mexanizmin təkmilləşdirilməsi məsələləri şərh edilir. Aqrar sahənin prioritet istiqamətləri, xüsusən xidmətlərin təşkili, aqrar istehsal, ətraf mühitin mühafizəsi və ekologiya məsələləri, kənd təsərrüfatı məhsullarının tədarükü, emalı və satışı, istehsalın intensivləşdirilməsi, aqrar sahədə istehsalın səmərəliliyi, infrastruktur, idarəetmənin mahiyyəti və təşkili xüsusiyyətləri izah olunur, nəzəri-praktik və metodoloji məsələlər tədqiq edilir. Nəşrdə aqrar sahənin inkişafına töhfə verə biləcək təkliflər də yer alıb.

Kitabdan ali məktəblərin aqrar iqtisadiyyat, idarəetmə ixtisası üzrə təhsil alan tələbələri, mütəxəssislər, rəhbər işçilər, elmi işçilər və sahibkarlar istifadə edə bilərlər.

Xətayi Əzizov

AZƏRTAC-ın xüsusi müxbiri

Tbilisi

Mənbə: azertag.az