Ələt azad iqtisadi zonasına dövlət dəstəyinin artırılması ölkə iqtisadiyyatına müsbət təsir edəcək. Dünya təcrübəsində də biz bu üsulun səmərəliliyini görə bilərik. Lakin bir məsələ də var ki, gələcəkdə Ələt azad iqtisadi zonasındakı iqtisadi güzəştlər bütöv ölkədə tətbiq edilə bilər. Nəzərə alsaq ki, Azərbaycan kiçik bir ölkədir, bütövlükdə ölkə azad iqtisadi zona ola bilər.

Bu sözləri Axar.az-a açıqlamasında iqtisadçı Natiq Cəfərli Prezident İlham Əliyevin Ələt azad iqtisadi zonasının yaradılması və fəaliyyətinin təşkili haqqında fərmanını şərh edərkən deyib.

N.Cəfərli qeyd edib ki, azad iqtisadi zonaların yaranması ümumilikdə keçən əsrin ortalarına aiddir:

“Keçən əsrin ortaları bir çox ölkədə sürətli inkişafı təmin etmək üçün bəzi iqtisadi zonalar yaradıldı. Əsasən də sərhədyanı və ya iqtisadi dinamikanın yüksək olduğu ərazilərdə bu təcrübə tətbiq edildi. Bu da öz növbəsində istehlakçıların, biznesmenlərin marağına səbəb oldu. Xüsusilə də ölkəyə xarici investisiya cəlb edilməsi baxımından çox səmərəli təcrübədir”.

Ekspert deyib ki, Ələt azad iqtisadi zonasının ölkəmiz üçün bir sıra faydaları olacaq:

“Birincisi, Abşeron yarımadası, xüsusilə də Bakı və Sumqayıt şəhərlərinin üzərinə düşən iqtisadi yük müəyyən mənada azalacaq. Bu gün bu şəhərlər ciddi sənayə mərkəzləridir. Ölkənin bütövlükdə sənaye yükünü Abşeronda cəmləmək heç də yaxşı hal deyil. Bu mənada Ələt azad iqtisadi zonası sənayeləşmənin regionlara da sıçramasına şərait yaradacaq. İkincisi, bu gün regionlardan Abşeron yarımadasına ciddi mənada insan axını var. Təbii ki, bu, paytaxtın və ətrafının əhali sayına təsir edir. Lakin Ələt azad iqtisadi zonasının yaradacağı imkanlar regionlarda da iş imkanlarını artıracaq. Beləcə regionların inkişafı əhalinin paytaxta axınının qarşısını ala bilər. Üçüncüsü, Ələt azad iqtisadi zonası ölkəyə investisiya axınını sürətləndirəcək”.

Mənbə: axar.az