Avtomobil sevgisini 250 minlik auditoriyaya çevirən azərbaycanlı bloger

Fəxri Əsədov avtomobillərə olan sevgisini öz əsas işinə çevirə bilib. O, maşın təkmilləşdirmə videolarını paylaşaraq özünə 250 minlik auditoriya yığmağa nail olub. Onun bunu necə etdiyini isə videomuzda izləyin.

Hər şey 2017-ci ildə, Fəxri Əsədovun ilk maşınını alması ilə başladı. O, 4000 manata aldığı və sadəcə A nöqtəsindən B nöqtəsinə gedə bilən, mühərriki bircə həftədən sonra dağılmış bir avtomobili sadəcə üç il ərzində Azərbaycanda və onun sərhədləri xaricində bir çox avtomobil həvəskarının tanıdığı “Mandarin” ləqəbli maşına çevirə bilib.

O, avtomobili üzərində çalışarkən bütün təkmilləşdirmə prosesini öz izləyiciləri ilə paylaşıb. Beləliklə, Azərbaycanın yəqin ki, ən məşhur avtoblogerinə çevrilib. Fəxri məhz bu avtomobil sayəsində hər il bir neçə tematik avtomobil festivallarına dəvət edilib.

Birinci layihəsinin uğurlu olduğunu görən Fəxri ikinci avtomobili alaraq işini daha da genişləndirməyə qərar verib. Və beləliklə, Bakıda yeganə nüsxədə olan “Mazda Miata” layihəsi başlayıb. Maraqlısı odur ki, hal-hazırda bu avtomobili görən heç kim onun yeddi ay ərzində heç işə düşə bilmədiyinə inanmaz.

Təbii ki, hal-hazırda Fəxri hər kəs kimi karantinin bitməsini gözləyir. Çünki qabaqda onu yeni festivallarda iştirak, kim bilir, bəlkə yeni avtomobil layihələri gözləyir.

Sputnik.az

ƏVVƏLKİ XƏBƏR

7 qolluq oyunda "Neftçi" "Keşlə"yə qalib gəldi

SONRAKI XƏBƏR

Prezident Azərbaycanda ISESCO-nun regional mərkəzi ilə bağlı müzakirələri yenidən gündəmə gətirdi