Üzeyir Hacıbəyli XIII Beynəlxalq Musiqi Festivalı çərçivəsində sentyabrın 22-də Fikrət Əmirov adına Gəncə Dövlət Filarmoniyasında musiqisevərlərə növbəti konsert proqramı təqdim edilib.

AZƏRTAC-ın bölgə müxbiri xəbər verir ki, Gəncə Dövlət Filarmoniyasında F.Əmirov adına Azərbaycan Dövlət Mahnı və Rəqs Ansamblı (bədii rəhbəri və baş dirijor Ağaverdi Paşayev) geniş konsert proqramı ilə çıxış edib.

Konsertdə Gəncə Şəhər İcra Hakimiyyətinin birinci müavini Səməd Tomuyev, Türkiyənin Gəncədəki baş konsulu Zeki Öztürk, şəhər Təhsil İdarəsinin müdiri Anar Qədiməliyev, ictimaiyyət nümayəndələri və digər rəsmi şəxslər iştirak edib.

Konsert Üzeyir Hacıbəylinin “Leyli və Məcnun” operasından kompozisiya ilə başlayıb. Leyli rolunu Rəvanə Əmiraslanova Məcnun rolunu isə İlkin Əhmədov ifa edib.

Mənbə: azertag.az