"Xaç atası"nın bərpa edilmiş versiyasının nümayiş ediləcəyi tarix açıqlanıb

Bakı, 14 yanvar, AZƏRTAC

Frensis Ford Koppolanın “Xaç atası” (1972) filminin bərpa olunmuş versiyası fevralın 24-də ekran əsərinin 50 illik yubileyi münasibətilə təkrar prokata çıxarılacaq.

AZƏRTAC TASS agentliyinə istinadla xəbər verir ki, bu barədə Rusiyanın film distributor şirkəti “Central Partnership” məlumat yayıb.

Mario Puzonun eyniadlı romanı əsasında ekranlaşdırılan film Nyu–York, Siciliya mafiya ailəsi Korleonenin hekayəsindən bəhs edir. Trilogiyanın ilk filmi 1972-ci il martın 24-də ekranlara çıxıb. Filmdə rolları Marlon Brando, Al Paçino, Daiyan Kiton və başqaları ifa edib.

Filmin bərpası üzərində işlər üç il davam edib. Neqativlərdə olan ləkələrin, zədələnmələrin və digər anomaliyaların aradan qaldırılmasına 4 min saatdan çox vaxt sərf edilib, mütəxəssislər min saatdan çox rəng korreksiyası ilə məşğul olublar. Bütün işlər rejissorun şəxsi nəzarəti altında həyata keçirilib.

Azertag.az

ƏVVƏLKİ XƏBƏR

"Qarabağ" Rumıniya klubu ilə qolsuz heç-heçə edib

SONRAKI XƏBƏR

Prezident İlham Əliyevin müsahibəsində səsləndirdiyi prioritet siyasi məsələlərlə bağlı BMTM-də fikir mübadiləsi aparılıb