Uzun illərdir xərçəng xəstəliyi ilə mübarizə aparan "Toppuş bacı" ləqəbi ilə şou-biznesdə məşhurlaşan aktrisa, Əməkdar artist Tünzalə Əliyeva növbəti "Ağıllı dərman" adlı preparatının vurulmasının videosunu paylaşıb.

Bizim.Media xəbər verir ki, Milli Onkologiya Mərkəzində müalicəsini davam etdirən sənətçiyə sözügedən preparatın pulunu, yəni 3200 manatı Almaniyada yaşayan həmyerlimiz Rəna Nizami adlı xanımın təşəbbüsü ilə həmvətənlərimiz göndərib.

Toppuş bacı yığılan məbləğlə "ağıllı dərman"ın alındığını və ona sistem vasitəsi ilə köçürüldüyünü lentə alaraq yayımladığı görüntülərdə nümayiş etdirib.

T.Əliyeva onun sağalması üçün yardım əlini uzadan həmvətənlərimizə və tezliklə sağalması üçün dua edən insanlara paylaşdığı video vasitəsi ilə minnətdarlığını bildirib.

Xatırladaq ki, ümumi olaraq Tünzalə Əliyevaya "ağıllı dərman" preparatının 12 dozası vurulmalıdır. Dərmanın ilk dozasını aparıcı Zaur Baxşəliyev alıb və dərman canlı efirdə aktrisaya sistem vasitəsi ilə köçürülüb.

Qeyd edək ki, uzun müddətdir xərçənglə mübarizə aparan T.Əliyeva bir müddət əvvəl redaksiyamızın əməkdaşı ilə söhbətində əlliyə yaxın kimyaterapiya aldığını açıqlayıb. Belə ki, o, ağır xəstəliyin metastaz verərək daxili orqanlarına yayıldığını bildirib.
Beynində bədxassəli şiş aşkarlandığını və səhhətinin ağır olduğunu bildirən aktrisa sağlamlıq vəziyyətini yaxşılaşdırmaq üçün təcili şüa terapiya almalı, daha sonra isə "ağıllı dərmanlar" qəbul etməli olduğunu açıqlayıb.
 

Mənbə: bizim.media