Mənsum İbrahimov: "Kim ehtiyac duysa, maska paylayıram..."- Müsahibə

Xalq artisti Mənsum İbrahimov Teleqraf.com-un suallarını cavablandırıb.

Onunla müsahibəni təqdim edirik.

- Mənsum müəllim, cəbhə boyu baş verən prosesləri izləyirsinizmi?

- Bəli, əlbəttə, dünəndən bütün xəbərləri izləyirəm. Çox təəssüf edirəm ki, dörd şəhid verdik. Allah ruhlarını şad eləsin. Ermənilər bütün dünyaya təxribatçı olduqlarını göstərdilər. Təbii ki, qüdrətli Azərbaycan ordusu düşmənin öhdəsindən gəldi və yerində otuzdurdu. Ermənilər gözlə görünən virusdurlar, onlar torpaqlarımızdan çıxmalıdırlar. Güclü ordumuz və bütün texniki bazamız var. Ali Baş komandanımızın əmri ilə torpaqlarımızı xilas etməyə hazırıq.

- Hazırda ölkəmizdə xüsusi karantin rejimi tətbiq olunub. Karantini necə keçirirsiniz?

- Ən önəmlisi sağlam qalmaqdır. Süni aparata qoşulub tavana baxmaqdansa, evdə oturub küçəyə baxmaq daha yaxşıdır. Bu, bütün dünyada gedən prosesdir. Xalqımızın birliyi ilə bu vəziyyətdən çıxacağıq.

Bizə də çox çətindir. Sənətçiyəm, hər zaman xalqın içində olmuşam. Dörd ayda 8 səfərimiz təxirə düşüb. Amma ən əsası sağlamlıqdır. İnşallah, ölkəmiz itki vermədən bu vəziyyətdən çıxacaq. Zərurət olmadıqca çölə çıxmaq lazım deyil.

Son günlər görürəm ki, insanlar maska taxırlar, sosial məsafəni qoruyurlar. Bu, alqışlanası haldı. Bilirsiniz ki, sənət adamları arasında, eləcə də hər birimizin ətrafımızda, tanışlarımızda koronavirusa yoluxanlar var. Şükür Allaha, sağalıblar və normal həyatlarına qayıdıblar. Bu isə fədakar həkimlərimizin sayəsindədir. Onların arasında da virusa yoluxan və dünyasını dəyişənlər var. Allahdan həkimlərimizə can sağlığı arzulayıram.

Hər kəs özünü qorumalıdır. Bu, elə bir virusdur ki, hər birimiz yoluxa bilərik. Onu da deyim ki, artıq insanlarda immunitet yaranıb və təcrübə toplamışıq. Kubadan, Çindən, Türkiyədən, Rusiyadan mütəxəssislər gətirilir. Virusa yoluxan zaman vaxtında müraciət edəndə qorxulu olmur. Panikaya düşmək lazım deyil. Qohumlarım arasında da virusa yoluxanlar olub. Artıq sağalıblar. Sadəcə ehtiyatlı olmaq lazımdır.

Virus yavaş-yavaş gedəcək. Hər kəs özünü qorusun. Bilmirsən, ətrafında kim virus daşıyıcısıdır. Yuxarıda da qeyd etdiyim kimi, qorxmaq və panikaya düşmək olmaz. Bizim üçün əsas virus ermənilərdir. O virusu torpaqlarımızdan çıxarmalıyıq və xalq olaraq ordumuza dəstək verməliyik. Hər birimiz müharibəyə hazırıq.

- Karantin rejimini harada keçirirsiniz?

- Ailəmlə bağda oturmuşuq. Elnur Əhmədov və Elçin Həşimovla qonşuyuq. Axşamlar bir yerdə oturub, sənət haqqında söhbətləşirik.

- Bəs, darıxmamaq üçün nə edirsiniz?

- Evdə kitabxanam var, kitab oxuyuram, xüsusilə, sənətimlə bağlı kitabları... Bağda işləyirəm, bu da başımı qatır.

- Toy mərasimləri, tədbirlər yoxdur, maddi cəhətdən ailənizi necə təmin edirsiniz?

- Maddi cəhətdən mənə də hamı kimi çətindir. Maaşla dolanırıq. Tədbirlər yoxdur. Bu, ellə gələn dərddir. Vəziyyətdən çıxmalıyıq. Ümumi bəladır, səbrli və ehtiyatlı olmaq lazımdır. Bununla yanaşı immuniteti qaldırmalıyıq. Mən hər gün həyətimdə 8 km hərəkət edirəm. Pandemiyadan öncə dəniz kənarında 8 km gəzirdim. 20 ildən çoxdur beləyəm.

- Uzun illər "Leyli və Məcnun" tamaşasında tərəf-müqabiliniz olmuş Nəzakət Teymurova xəstəxanadadır. Səhhətindən xəbərdarsınızmı?

- Səhnəmizin Leylisi, sevimli tərəf-müqabilim Nəzakət Teymurova xəstəxanaya yerləşdirilib. Dünən danışdım. Şükür Allaha, səhhəti yaxşıdır, stabildir, daha yaxşı olacaq. Təbii ki, həkimlərimizin dəstəyi ilə... O, çox güclü xanımdır. Virusa yoluxan bütün xəstələrə Allah şəfa versin.

- Əməkdar artist Bəhram Bağırzadənin səhhəti ilə necə, maraqlanmısınızmı?

- Bəhram Bağırzadənin vəziyyəti bir az kritik oldu. Yaxşılığa doğru gedir və Allah can sağlığı versin.

- İlk zamanlar koronavirusa inanmayanlar çox idi...

- Mən ilk vaxtlardan virusun mövcudluğuna inanmışam. Bu qədər oyun olmaz. Bütün dünya bu oyunun qurbanına çevrilə bilməz. Onu da deyim ki, virusa yoluxanların çoxu inanmayanlardır. Bunu özləri də etiraf ediblər ki, virusa inamayıb və qaydalara riayət etməyiblər.

Mən zərurət olmadıqca evdən çıxmıram. Marketə isə səhərlər və heç kim olmayanda gedirəm. Mağazada bir-iki nəfər olur. On dəqiqəyə alış-veriş edib çıxıram. Avtomobilimdə spirt və maska var. Ehtiyacı olan hər kəsə maska verirəm.

Teleqraf.com

ƏVVƏLKİ XƏBƏR

“Beynəlxalq hüquq bizdən danışıqlar deyil, silahlı güc tətbiqi tələb edir” - MÜSAHİBƏ

SONRAKI XƏBƏR

Türkiyənin “Burak” sinfinə məxsus korvetləri modernləşdirilir