Budapeşt, 25 sentyabr, AZƏRTAC

Ermənistan dərk etməlidir ki, onun tərəfindən Azərbaycan ərazilərinin işğalı dünyada dəstək tapmır və heç vaxt tapmayacaq.

AZƏRTAC xəbər verir ki, Macarıstanın Vesprem şəhərindəki Pannon Universitetinin “Dövlət və hüquq” kafedrasının əməkdaşı Peter Tyukodi bu haqda fikirlərini agentliyin müxbiri ilə söhbətində BMT Baş Assambleyasının 75-ci sessiyasının ümumi debatlarında Azərbaycan Prezidenti İlham Əliyevin çıxışını şərh edərkən bildirib.

Ekspert deyib: “Heç bir dövlət təcavüz, işğal və zəbt edilmiş torpaqların məskunlaşdırılması kimi qanunsuz hərəkətlərin nəticələrinin legitimləşdirilməsinə və beynəlxalq birlik tərəfindən tanınmasına ümid edə bilməz. Mənim ölkəm olan Macarıstanın İsraillə çox səmimi münasibətləri mövcuddur. Lakin bütün bunlara baxmayaraq, bizim israilli dostlarımız işğal edilmiş Fələstin ərazilərində yaşayış məskənlərinin yaradılmasının biz tərəfdən tanınmasını və dəstəklənməsini gözləməsinlər. İsraillə müqayisədə dünyada qat-qat az dostu olan Ermənistan haqqında isə danışmağa dəyməz”.

Bununla yanaşı, Tyukodi xatırladıb ki, Ermənistan ilə Macarıstan arasında hətta diplomatik münasibətlər belə yoxdur. “Bu münasibətlər 2012-ci ildə - Budapeşt və Bakı Azərbaycan vətəndaşının Vətənə tamamilə qanuni ekstradisiyasını həyata keçirdikdən sonra Ermənistan tərəfindən birtərəfli qaydada və kifayət qədər isterik formada kəsilib. Bu addımdan sonra Ermənistanda bizim tərəfimizdən azacıq simpatiyaya necə ümid edə bilərlər”, - deyə həmsöhbətimiz istehza ilə vurğulayıb.

Ekspert deyib: “Biz tamamilə Bakının tərəfindəyik. Prezidentin BMT Baş Assambleyasının 75-ci sessiyasının ümumi debatlarındakı çıxışında ifadə etdiyi mövqe təkcə Budapeştin deyil, həm də bütün dünya birliyinin mövqeyi ilə tamamilə üst-üstə düşür”.

Pərvanə Qarayeva

AZƏRTAC-ın xüsusi müxbiri

Budapeşt

Mənbə: azertag.az