İyirmi yeddi ildən sonra gələn azadlığın adı - Zəngilan

Şahidlərin sözlərinə görə, Füzuli və Cəbrayıl rayonları işğal olunduqdan sonra zəngilanlılar 67 gün tam mühasirə şəraitində ermənilərlə vuruşublar.

BAKI, 20 oktyabr — Sputnik. Bu gün işğaldan azad edildiyi elan olunan Zəngilan rayonu 1993-cü ildə oktyabrın 28-dən 29-na keçən gecə işğalçı ermənilər tərəfindən zəbt edilmişdi.

Şahidlərin sözlərinə görə, Füzuli və Cəbrayıl rayonları işğal olunduqdan sonra zəngilanlılar 67 gün tam mühasirə şəraitində ermənilərlə vuruşublar.

Ermənilərin Zəngilanda ikinci Xocalı faciəsini törətmək istəyi alınmayıb. Sakinlər cəld tərpənərək özlərini Araz çayına atmaqla İran ərazisinə keçiblər və bununla da gözlənilən növbəti soyqırımdan xilas olublar.

Ərazisi 730 kvadrat kilometr olan Zəngilan rayonu işğal olunanda əhalisi 35,6 min nəfər olub.

Zəngilan rayonu eyni adlı şəhərdən, Mincivan qəsəbəsindən və 83 kənddən ibarətdir. Rayonda 14 tibbi müəssisəsi, 11 uşaq bağçası, 62 ümumtəhsil məktəbi, 23 klub, 8 mədəniyyət evi, 3003 min cild kitab saxlanılan 70 kitabxana olub. Zəngilanın iqtisadiyyatının əsasını kənd təsərrüfatı - üzümçülük, tütünçülük və heyvandarlıq təşkil edib. İşğaldan sonra Bakı-Mincivan-Qafan dəmiryolu xəttinin keçdiyi Mincivan stansiyası tamamilə dağıdılıb. Naxçıvan istiqamətində Bakı-Naxçıvan-İrəvan dəmiryol xəttinin Mehridən keçən 41 kilometrlik ərazisi blokadaya alınıb.

Zəngilan 20 oktyabr 2020-ci il tarixində işğaldan azad edilib!

Sputnik.az

ƏVVƏLKİ XƏBƏR

Türkiyə İraqın şimalında əməliyyat keçirdi - 6 PKK terrorçusu məhv edildi

SONRAKI XƏBƏR

Rusiyalı blogerin təşəbbüsünə Azərbaycanla nəfəs alan hər kəs qoşuldu