İqor Korotçenko: “Fransa və ABŞ-ın Rusiya ilə Azərbaycana qarşı Qarabağla bağlı razılaşmanı pozmaq cəhdləri yalnız onların geosiyasi məğlubiyyəti faktını gücləndirir”

Moscow-baku.ru saytı Fransa Senatının qəbul etdiyi və Azərbaycan ərazilərində terrorçu “dövlət”i tanımağa çağıran və beynəlxalq hüququ ayaqlayan qərarı haqda Rusiyanın nüfuzlu hərbi-siyasi eksperti, “Milli Müdafiə” jurnalının baş redaktoru İqor Korotçenkonun geniş fikirlərini dərc edib. Həmin məqaləni oxucularımıza təqdim edirik.

2 gün əvvəl Fransa Senatı, ölkə hökumətini “Dağlıq Qarabağ”ı müstəqil bir dövlət kimi tanımağa çağıran bir qərar qəbul etdi. Sənəddə deyilir: "Senat Fransa hökumətini “Dağlıq Qarabağ Respublikası”nı tanımağa və bu tanınmadan daimi bir sülhün bərqərar olması üçün danışıqlar vasitəsi kimi istifadə etməyə çağırır".

Qətnamə məsləhət xarakterlidir və heç bir hüquqi qüvvəyə malik deyil. Amma maraqlıdır- qətnaməni şərh edən Fransa Dövlət Katibi Jean-Baptiste Lemoine Qarabağın birtərəfli tanınmasının heç kimə fayda verməyəcəyini və vasitəçilik səyləri göstərməyəcəyini söylədi. Lemoine, ATƏT-in Minsk qrupunun üzvü olan Fransanın münaqişə tərəfləri tərəfindən 9 noyabrda əldə edilmiş atəşkəs razılaşmasının həyata keçirilməsinin tərəfdarı olduğunu xatırlatdı.

Azərbaycan Prezident Administrasiyasına görə, bu qətnamə dar siyasi ambisiyalar üçün qəbul edilmiş "kağız parçası" dan başqa bir şey deyil. Bu, BMT Təhlükəsizlik Şurasının daimi üzvü, həmçinin Minsk Qrupunun da həmsədri olan Fransanın beynəlxalq hüququ, BMT Nizamnaməsini və BMT TŞ-nin müvafiq qətnamələrini kobud şəkildə pozmasıdır. PA-da qeyd ediblər ki, bu, Fransanın TŞ daimi üzvü kimi missiyası və fəaliyyətinin məqsədləri ilə bağlı ciddi suallar doğurur.

Xatırladaq ki, “Dağlıq Qarabağ” nəinki başqa ölkələr, heç Ermənistanın özü tərəfindən də tanınmır. Rusiya Prezidenti Vladimir Putin Dağlıq Qarabağ zonası və ona bitişik 7 rayonun Azərbaycan ərazisi olduğunu dəfələrlə vurğulamışdır.

Fransa Senatının qərarını politoloq, "Milli Müdafiə" jurnalının baş redaktoru İqor Korotçenko "Moskva-Bakı"-ya belə şərh edib: “Fransadakı erməni lobbisi kifayət qədər təsirli və maddi cəhətdən bacarıqlıdır, bu səbəbdən bu qətnamə qəbul edildi. Və burada, Fransız deputatlar tərəfindən yalnız siyasi lobbi deyil, açıq-aşkar siyasi korrupsiya da mövcuddur. Bu, Makronun Ermənistanın baş nazirini hakimiyyətdə saxlamağa çalışmaq üçün Paşinyana göndərdiyi birmənalı dəstək siqnalıdır.

Əlavə olaraq, bu, üçtərəfli müqavilənin Rusiyanın vasitəçiliyi ilə imzalanması və Fransanın kənarda qalması mövzusunda qısqanclığın bir təzahürüdür- Makron bu razılaşma barədə mediadan məlumat aldı. Əlbəttə ki, əsəbiləşdi. Onun ambisiyaları vuruldu. Paris, Qarabağdakı vəziyyətin tənzimlənməsi prosesindən kənarda qaldığını başa düşdü. Bu, Fransanın üzünə siyasi bir şillə idi. Senatın qəbul etdiyi qətnamə Qarabağdakı müharibənin nəticələrindən sonra bağlanmış sənədə maksimum zərbə vurmaq cəhdidir.

Makronun oyununda “ağıllı” bir cəhd görürük. Onun Türkiyəni Qarabağdakı müharibəni Suriyada döyüşlərdə iştirak etmiş döyüşçülərlə təmin etməkdə günahlandırdığını hamımız xatırlayırıq. İndi Senat bir qərar qəbul etdi və Fransa XİN belə qərarların heç kimə fayda verməyəcəyini bildirdi. Makron bu yaxınlarda Fransanın Azərbaycanın ərazi bütövlüyünü dəstəklədiyini söyləmişdi. Təbii olaraq, həm Senata, həm də XİN-ə nəzarət edən məhz Makrondur. Əslində, belə çıxır- Paris bir şey deyir, başqa bir şey edir və ya əksinə.

Məsələn, erməni lobbisi sayəsində bəzi Fransız bələdiyyələri, şəhər məclisləri Qarabağı tanımağa çalışdı. Nəsə faydası varmı? Yoxdur. Borjomini Azərbaycanın müharibədə qalib gəldiyi bir vəziyyətdə içmək çox gecdir, bu müharibənin siyasi nəticələri ümumiləşdirilmişdir. Ermənistan qoşunları Azərbaycan ərazilərini tərk edir. Azərbaycana qarşı ərazi iddiaları daha mənasızdır. Azərbaycanın hərbi qələbə amili hər şeyi öz yerinə qoydu. Buna görə, Fransanın etməyə çalışdığı hər şey mənasız dalğalanmaqdır.

Fransa indi Dağlıq Qarabağın statusu məsələsini təbliğ edərək Qarabağdakı erməni əhalisinə humanitar yardım göstərir. Paris Azərbaycan ərazisindən kənarda qalan erməni minalarının zərərsizləşdirilməsi üçün istehkamçılara pul ayırsa daha yaxşı olar. O zaman Paris konstruktiv bir rol oynayacaqdı, lakin hələlik yalnız təhrikçi rolunu oynayır.

Çox yaxşı başa düşürük ki, Parisin yola düşən qatara tullanmaq cəhdləri heç bir nəticə verməyib. Azərbaycanın ərazi bütövlüyü bərpa edildi, üçtərəfli razılaşma ilə təsdiqləndi, Paşinyan təslim oldu. Heç bir şəkildə DQR olmayacaq, Azərbaycan dövləti çərçivəsində Qarabağın dağlıq hissəsində ermənilərin mədəni muxtariyyəti olacaq. Bu səbəbdən, bəzi siyasi hərəkətlar tamamilə səhvdir, heç nəyə səbəb olmayacaq və heç nəyə təsir etməyəcək. Fransa öz ambisiyalarını özündə saxlaya bilər, heç kimə lazım deyil. Ancaq Fransa Azərbaycandakı işinə bu şəkildə zərbə vura bilər. Aydın məsələdir ki, bu cür məzhəkələr Bakının reaksiyası olmadan qalmamalıdır. Azərbaycan hörmətəlayiq bir ölkədir və ona qarşı bu cür davranış Fransa üçün Azərbaycanda müəyyən iqtisadi itkilərlə nəticələnə bilər.

Bundan əlavə, Fransa bir daha ATƏT-in Minsk qrupunun həmsədrlərindən biri olmaq üçün mənəvi və qanuni hüququnu itirdiyini sübut etdi. Digər tərəfdən, Minsk qrupu indi nəyəsə təsir edirmi? Rusiyalı sülhməramlılar Qarabağdadır. Rusiya Azərbaycanın ərazi bütövlüyünü təsdiqlədi və ona hörmət edir.

Parisin bu hərəkəti Moskva tərəfindən necə qəbul ediləcək? Kimsə yersiz davranırsa, reaksiya verməyin nə faydası var? Seçkilərdə iştirak etmək üçün xarici dövlətlərdən pul alan keçmiş Fransa Prezidenti Nikola Sarkozinin mühakimə olunduğunu bilirik. Fransada belə bir siyasi korrupsiya faktları var. Ancaq fransızlara bu deputatları bu işlərə cəlb edənlərin kimlər olduğunu və onların məsuliyyətsiz davrandıqlarını göstərmək lazımdır. Əgər qətnamə müharibədən əvvəl qəbul olunsaydı, birtəhər diqqət çəkərdi. Ancaq indi fransız deputatlar istəsələr bu kağızı sadəcə özlərindən asa və onunla gəzə bilərlər.

Moskva son həftələrdə dəfələrlə Fransa və ABŞ-ın Qarabağla bağlı imzalanmış bəyanatla əlaqəli bir şəkildə qeyri-adekvat davrandıqlarına diqqət çəkdi. Paris və Vaşinqtonla əlaqəli açıqlamalar var idi. Ermənilər Fransa üçün bu qədər əzizdirlərsə, Paşinyan siyasi karyerasını bitirsə və həbs edilməsə, Makron onu Fransadakı erməni diasporu üzrə məsləhətçisi kimi götürsün, ya da Parisdə sürgündə olan “DQR” hökumətini yaratsınlar. Hamısı gülməli və axmaqdır.

Bu qətnamə ilə Fransa bütün Qərbi tamamilə nüfuzdan saldı. Həm Fransa, həm də ABŞ Azərbaycanın ərazi bütövlüyünü tanıdığımızı və gərginləşmə dövründə Ermənistanı da müdafiə etməyə başladığımızı söylədilər. Əvvəldən qərəzli münasibət gördük. Qərb öz kuklasını Yerevanda hakimiyyətə gətirdi. Sonra gördüklərimiz- Makronun Paşinyanla ortaq siyasi rəqsləri, Parisdə qarşılıqlı qucaqlaşmalar. Məşhur selfini xatırlayın.

Azərbaycanın qələbəsi yeni siyasi reallıqlar yaratdı. Fransa və ABŞ-ın Rusiyaya qarşı çıxaraq razılaşmanı pozmaq və oyun oynamaq cəhdləri yalnız onların geopolitik məğlubiyyətlərini artırır, bütün bu cəhdlər uğursuzluğa məhkumdur. Oyun artıq oynanmışdır. Mənə elə gəlir ki, Paris bu yeni reallığı hələ dərk etməmişdi və ya Senat deputatları o qədər siyasi ittihamlara məruz qalmışdılar ki, bu “möhtəşəm” qətnaməyə səs verməyə bilməzdilər.

Bu payızda formalaşan və Rusiyanın vasitəçiliyi ilə Qarabağla bağlı üçtərəfli Bəyanatın tarixi imzalanması ilə sona çatan Qarabağ ətrafında vəziyyət, Qərbin tamamilə itirdiyi Rusiya ilə Qərb arasında geosiyasi bir döyüşə çevrildi. Vasitəçi olaraq öz xidmətlərini Azərbaycana və Ermənistana təklif edən Rusiya bu vəziyyəti geosiyasi cəhətdən qazandı. Azərbaycan qazandı, Rusiya qazandı. Başqa qalib yoxdur.

İndi bir daha Qərbin beynəlxalq hüquqa hörmətsizliyini, Qərbin həqiqi simasını görürük. Ancaq bu artıq heç kimi təəccübləndirmir. Demokratiyanın bir mənfi tərəfi var. Bu tərəfi həm Yerevanda, həm də Parisdə görürük.

Fransa, Makronun siyasi səhvləri üzündən dünya səhnəsində zəif bir oyunçu halına gəldi. Son aylardakı onun bütün ritorikaları Parisin bir sıra əhəmiyyətli diplomatik uğursuzluqlara məruz qalmasına səbəb oldu. Bu isə ölkənin nüfuzuna və iqtisadiyyatına təsir etdi. Makronun özünü Avropa İttifaqının lideri və beynəlxalq miqyasda bir siyasətçi kimi göstərmək cəhdləri siyasi bir fiasko ilə sona çatdı.

Azərbaycandakı hakimiyyət sisteminin bəzi Avropa ölkələrini qıcıqlandırdığını bilirik, çünki Bakı xaricdən maliyyələşən QHT-lərin fəaliyyətinə çox sərt məhdudiyyətlər qoyaraq ölkədə 5-ci kolonun fəaliyyət göstərməsinə imkan vermədən müstəsna olaraq milli maraqlarını qoruyur. Azərbaycan suverenliyini aydın və ardıcıl şəkildə müdafiə edir. Bunun əvəzinə Azərbaycanda “demokratiyanın pozulduğunu” eşidirik. Ancaq demokratiya Yerevanda və ya Parisdə “qələbə çalır”. Baxın, dövlətin 3-cü şəxsinin- parlamentin spikeri Ararat Mirzoyanın- İrəvanın mərkəzində sözün əsl mənasında linç edilməsinə heç bir Qərb liderinin heç bir ictimai reaksiyası olmadı. Bu, Qərb demokratiyasının üzüdür. Və erməni demokratiyasının əsil üzüdür. Ermənistanda silahlı izdiham Baş nazirin iqamətgahını dağıtdı. Bu nədir, demokratiyadır? Yox. Bunlar artıq heç kimin təəccübləndirmədiyi ikili standartlardır. Bu müasir dünyadır. Azərbaycan indi sadəcə düşmənlərini və dostlarını daha yaxşı görəcəkdir.

Buna görə də, Fransa vəziyyətə heç bir şəkildə təsir göstərə bilməyəcəkdir. Nikol Paşinyanın Qarabağın statusu məsələsini irəli aparmaq cəhdləri də uğursuzluğa məhkumdur. Fransa Ermənistanın Baş Nazirinə hakimiyyətdə qalacağına dair yalan ümidlər verməyə çalışır. Əminəm ki, Qarabağla bağlı üçtərəfli razılaşma həyata keçiriləcək və Paşinyanın siyasi karyerası günləri bitəcək. Ona tam müddətində indiki yerində oturmayacaq. Erkən seçkilər olacaq və ya Ermənistan heç vaxt çıxa bilməyəcəyi uçuruma sürüklənəcək”.

Müəllif: Nana Xoşteriya

Tərcümə: Elçin Bayramlı

Yazı Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi ilə "Ermənistan-Azərbaycan, Dağlıq Qarabağ münaqişəsi haqqında həqiqətlərin dünya ictimaiyyətinə çatdırılması, Azərbaycanın ədalətli mövqeyinin müdafiə edilməsi" istiqaməti çərçivəsində hazırlanıb.

Mənbə: sia.az