Erməni İnqilabi Federasiyası – Daşnaksütyun nümayəndə heyətinin Moskvaya səfəri və Rusiya Dövlət Dumasında "Vahid Rusiya" və "Ədalətli Rusiya" partiyalarının nümayəndələri ilə keçirdiyi görüşlər regionun siyasi gündəmində diqqət çəkən hadisədir.

Musavat.com Rusiya mediasına istinadən xəbər verir ki, Daşnaksütyunun Ali Orqanının nümayəndəsi İşxan Saqatelyan, Armen Rustamyan və Sevan Danielyanla birlikdə Moskvada işgüzar səfərdə olduğunu açıqlayıb. Onun sözlərinə görə, Rusiya Dövlət Dumasında «Vahid Rusiya» və «Ədalətli Rusiya» partiyalarının nümayəndələri ilə görüş keçirilib. Tərəflər qarşılıqlı maraq doğuran məsələləri və ikitərəfli münasibətlərin inkişafını müzakirə ediblər.

İlk baxışdan bu, siyasi partiyalar arasında adi əməkdaşlıq təması təsiri bağışlaya bilər. Lakin görüşün iştirakçıları, Daşnaksütyunun siyasi mövqeyi və Ermənistan-Rusiya münasibətlərinin hazırkı vəziyyəti məsələyə daha geniş kontekstdə yanaşmağı tələb edir.

Əslində, Daşnaksütyunun Rusiya siyasi dairələri ilə əlaqələri yeni deyil. Hələ 2007-ci il iyulun 3-də «Ədalətli Rusiya» ilə Daşnaksütyun arasında əməkdaşlıq sazişi imzalanıb. Sənədə Sergey Mironov və Armen Rustamyan imza atıblar. 2025-ci ilin iyulunda tərəflər bu əməkdaşlığın 18-ci ildönümünü də qeyd ediblər. Həmin dövrdə Daşnaksütyun nümayəndələri Rusiya Dövlət Dumasında «Vahid Rusiya» fraksiyasının rəhbəri Vladimir Vasilyev və vitse-spiker Pyotr Tolstoyla da görüşüblər. Müzakirələrdə beynəlxalq proseslər, regional təhlükəsizlik və Rusiya-Ermənistan münasibətləri diqqət mərkəzində olub. Deməli, 2026-cı ilin oktyabrında baş tutan səfər əvvəlki əlaqələrin davamı kimi qiymətləndirilə bilər. Ancaq burada mühüm siyasi fərq var: «Ədalətli Rusiya» ilə Daşnaksütyun arasında uzunmüddətli əməkdaşlıq sazişi mövcuddur, «Vahid Rusiya» isə Rusiyanın hakim partiyasıdır. Hakim partiyanın nümayəndələri ilə təmaslar Daşnaksütyuna Rusiya siyasi elitası ilə birbaşa dialoq imkanları yaradır.

Daşnaksütyunun Moskvada qəbul edilməsinin əsas səbəblərindən biri Ermənistanın xarici siyasətində baş verən dəyişikliklərlə bağlı ola bilər. Rusiya üçün bu cür təmaslar Ermənistanın siyasi mühitində mövqelərini qorumaq, hakimiyyətlə yaranan fikir ayrılıqları fonunda alternativ dialoq kanallarına malik olmaq baxımından əhəmiyyət daşıya bilər. Başqa sözlə, Moskva Ermənistanla münasibətlərini yalnız Paşinyan hökumətindən asılı vəziyyətdə saxlamaq istəmir. İşxan Saqatelyanın son açıqlamaları da bu baxımdan maraqlıdır. O, Ermənistanın müxtəlif güc mərkəzləri ilə paralel əməkdaşlıq imkanlarını itirdiyini iddia edərək Paşinyanın xarici siyasətini tənqid edib. Saqatelyan həmçinin Ermənistanın Avrasiya İqtisadi İttifaqından çıxmasının iqtisadi nəticələrinin ağır ola biləcəyini vurğulayıb.

Daşnaksütyunun digər siyasi istiqaməti də diqqətəlayiqdir. Partiya «Hay Dat» konsepsiyası çərçivəsində irəli sürdüyü tələblər, Azərbaycan-Türkiyə münasibətlərinə yanaşması və Ermənistanın regional siyasətinə dair baxışları ilə tanınır. Bu baxımdan onun Rusiya siyasi dairələri ilə əlaqələrinin genişlənməsi Cənubi Qafqazdakı proseslər üçün də əhəmiyyət daşıyır. Bakı üçün əsas məsələ Ermənistanın gələcək xarici siyasət kursu və Azərbaycanla sülh gündəliyinə münasibətidir. Daşnaksütyun uzun müddətdir Azərbaycanla münasibətlər, Qarabağ məsələsi və Türkiyə ilə əlaqələr mövzusunda sərt siyasi mövqeyi ilə seçilir.Bu baxımdan partiyanın Rusiya siyasi dairələri ilə təmaslarının genişlənməsi diqqətlə izlənilməlidir.

Mənbə: musavat.com