“Dəmir yumruğ”un yaratdığı yeni reallıq-RAKURS

Azərbaycan Respublikasının Prezidenti cənab İlham Əliyev dəfələrlə xalqa etdiyi müraciətlərində, mətbuata müsahibələrində müharibənin baş vermə səbəbləri barədə yerli və xarici ictimaiyyəti məlumatlandırıb. Fevralın 26-da isə yerli və xarici media nümayəndələri üçün keçirdiyi mətbuat konfransında cənab Prezident bir daha bildirdi ki, 30 il davam edən danışıqlar heç bir nəticə vermədi və Azərbaycan bu məsələni təkbaşına həll etdi.

Müharibəni geridə qoyduqdan sonra qarşıda duran quruculuq-bərpa işləri barədə geniş məlumat verən cənab Prezident Azərbaycanın tarixən birgəyaşayış modelinin universal nümunəsi olduğunu qeyd etdi. Ölkə başçımız həm də vurğuladı ki, düşmənçilik səhifəsi çevrilməlidir. 10 noyabr tarixli Bəyanat bunun üçün zəmin yaradır. Bəyanata sadiqlik nümayiş etdirməklə regionda sülh təmin olunacaq. Birgəyaşayışın əsas üsulu əməkdaşlıqdır. Azərbaycanın məqsədi artıq üçtərəfli qaydada-Ermənistan və Rusiya ilə birlikdə kommunikasiyaların bərpası, Zəngəzur dəhlizinin yaradılması və nəqliyyat baxımından bütün maneələri aradan qaldırmaqdır.

Həmçinin cənab Prezident onu da qeyd edib ki, bu baş tutsa Ermənistan da mənfəət əldə edəcək, sülhün xeyrini görəcəkdir. Çünki birgəyaşayış dayanıqlı inkişaf üçün əsas yaradır. Prioritet vəzifələrdən biri uzunmüddətli sülhün təmin edilməsi və müharibə risklərinin sıfra endirilməsidir.

Cənab Prezident onu da vurğulayıb ki, bu gün atılan addımlar gələcəyə xidmət etməlidir. Biz indi rusiyalı sülhməramlıların yerləşdiyi sahədə inteqrasiyanın istənilən formasına hazırıq-deyən cənab Prezident Xankəndinin və hazırda erməni əhalinin yaşadığı digər ərazilərin inteqrasiyasını labüd proses hesab etdi.

Ölkə başçımız media nümayəndələrinin diqqətinə onu da çatdırdı ki, Azərbaycan böyük investorlar üçün daha maraqlı ölkədir. Belə ki, inşa olunan yollar bölgənin inkişafını sürətləndirəcək və regionun tranzit əhəmiyyətini artıracaqdır. Aeroport ilə yanaşı Şuşa şəhərinə iki avtomobil yolu tikilir. Həmin yollardan birinin adı “Qələbə yoludur”. Nisbətən aran ərazidən keçən digər yol da aeroportdan birbaşa gediş-gəlişi təmin edəcək.

Bu isə o deməkdir ki, xaricdə yaşayan azərbaycanlılar, həmçinin digər ölkələrin vətəndaşları Qarabağa gəlmək imkanına malik olacaqlar. Qarabağda böyük iqtisadi layihələr icra olunacaq-deyə, dünyaya mesaj göndərən Ali Baş Komandan onu da qeyd etdi ki, böyük şəhərlərin baş planları tərtib edilir.Bu isə zaman tələb edir. Azərbaycanın yarışacağı əsas tərəf müqabili zamandır.

Cənab Prezident marqalı tərəflərə müraciət edərək bildirdi ki,bütün tərəfdaş və maraq göstərən ölkələr bərpa işlərinə cəlb oluna bilərlər. Dost ölkələrdən olan şirkətlər artıq bərpa işlərinə cəlb olunur. Belə ki,10 min kv km –dən çox ərazi azad edilib. Buna görə də Azərbaycanın bütün dostları üçün kifayət qədər iş var. Bütün dünyanın diqqətinə çatdıraraq cənab Prezident bildirdi ki, böyük Qələbə sayəsində Azərbaycan daha cəlbedici investisiya ölkəsinə çevrilib.

Çoxsaylı və müxtəliftəyinatlı logistik layihələr icra olunacaq. Qarabağ alternativ enerji mənbəyinə çevriləcək.
Cənab Prezident onu da qeyd etdi ki, bərpa işləri planlı və sistemli şəkildə aparılacaqdır. Bu isə o deməkdir ki, şəhərlərin və kəndlərin inkişafının baş planlarının tərtib edilməsi prosesi artıq başlanıb. Pilot layihələrin icrası da başlanılıb. Bir layihə- “ağıllı kənd” layihəsi artıq icra olunur. Açıqlama verərək cənab Prezident onu da bildirdi ki, Zəngilan rayonunun 3 kəndində-Birinci, İkinci, Üçüncü Ağalı kəndlərində bu layihə həyata keçiriləcək. Cari ilin sonuna qədər layihə tam başa çatacaqdır.

Orada təqribən 1000-ə yaxın insan yerləşəcək. Lazımı infrastruktur qurulacaq, əkin sahələri bərpa ediləcək, insanlar oraya qayıdacaqlar-deyən cənab Prezident onu da qeyd etdi ki, belə pilot layihələr çox olacaq. Bərpa prioritetləri mütləq olaraq qorunacaq. Ərazilərin bərpa olunması üçün bütün imkanlar səfərbər olunacaq. Dövlətin 2,2 milyard manat investisiyası bir başlanğıcdır.

Mən isə öz növbəmdə bir Azərbaycan vətəndaşı olaraq hər birimizi cənab Prezidentin ətrafında yaratdığımız “Dəmir yumruq”da daha sıx birləşməyə və bu layihələrə öz töhfəmizi verməyə çağırıram və əminliklə bildirirəm ki,bərpa-quruculuq işlərinin fəal iştirakçısı olacağam.

Çingiz Dadaşov,
“Demokratik İnkişafın Təşviqi“ İB sədri,
hüquqşünas

Cebhe.info

ƏVVƏLKİ XƏBƏR

"Qalatasaray"ın qalibiyyət seriyasına son qoyuldu

SONRAKI XƏBƏR

Dünya yeni ədalətsizliklə üz-üzə - COVAX özünü doğrultmur