""Dövlətlərarası münasibətlər necə olmalıdır?" sualına cavab tapmaq üçün dərin xəyallara qapılmaq lazım deyil. Azərbaycan və Türkiyə dostluğu və qardaşlığı buna bariz nümunədir. 15 iyun - Milli Qurtuluş Günündə mədəniyyət paytaxtı sayılan Şuşada Azərbaycan və Türkiyə arasında müttəfiqlik münasibətləri ilə bağlı Şuşa Bəyannaməsinin imzalanması tarixi hadisədir".

 

Bunu Pravda.az-a açıqlamasında Azərbaycan-Türkiyə parlamentlərarası əlaqələr üzrə işçi qrupunun üzvü Elman Nəsirov Şuşa Bəyannaməsinin əhəmiyyətindən danışarkən deyib.

 

 

Milli Məclisin deputatı bildirib ki, Bəyannamə nəticəsində Azərbaycan-Türkiyə əməkdaşlığı yeni mərhələyə qədəm qoyur: "Cənab Prezident İlham Əliyev Bəyannamənin siyasi əhəmiyyətinə görə bunu tarixi sənəd adlandırıb. Türkiyə Cümhuriyyətinin Prezidenti Rəcəb Tayyib Ərdoğan isə qeyd etdi ki, bu, iki dövlətin əməkdaşlığının yol xəritəsidir. Yəni bundan sonra necə hərəkət edəcəyimiz ilə bağlı bizə yol göstərəcək sənəddir. Bundan sonra da iki qardaş dövlətin həm siyasi və iqtisadi, həm də mədəniyyət və elm sahəsində əməkdaşlığa dair geniş müddəalar öz əksini tapıb".

 

E.Nəsirov bildirib ki, Prezident İlham Əliyev Şuşa Bəyannaməsi ilə bağlı iki məsələnin əhəmiyyətini xüsusi qeyd edib: "Birincisi, Şuşa Bəyannaməsində Azərbaycanla Türkiyə arasında müdafiə sahəsində əməkdaşlığın yeni mərhələsinin başladığını bildirdi. Prezident Bəyannamədə qarşılıqlı hərbi yardım göstərmək haqqında bəndi vurğulamaqla bu sənədin məhz müdafiə sahəsində ciddi perspektivləri özündə əks etdirən razılaşma olduğununu diqqətə çatdırıb. Bu, təkcə erməni ictimaiyyətinə deyil, eyni zamanda dünya birliyinə ciddi mesajdır ki, Azərbaycan və Türkiyə bütün sahələrdə, xüsusilə hərbi və müdafiə sənayesi sahəsində müttəfiqdirlər. Prezidentin vurğuladığı ikinci əsas məqam isə nəqliyyat və kommunikasiya sahəsində hər iki dövlətin ortaq baxışı ilə bağlıdır. Həm Türkiyə, həm də Azərbaycan lideri açıq şəkildə bildirir ki, Zəngəzur dəhlizi açılmalıdır. Bu dəhlizin işə salınması isə cənab Ərdoğanın dediyi kimi 3+3” əməkdaşlıq platformasının reallaşmasını təmin edəcək. Nəticə etibarilə, bu, regionda sülhə və təhlükəsizliyə xidmət edəcək".

 

Nəzrin Cavid

Mənbə: pravda.az