"Bu halda ermənilərə pul verilməyəcək"

“Nikol Paşinyan danışıqlara hazır olduğunu deyir. Amma hazır olmaq o demək deyil ki, məsələ qısa müddətə həll oluna bilər. Gəlib danışıqlarda elə şərt qoya bilər ki, bu, danışıqlara hazır olmamaq mənasına gələr”.

Bunu Azərbaycan Demokrat Partiyasının sədri Sərdar Cəlaloğlu deyib.

Onun fikrincə, Paşinyan qeyd-şərtsiz, beynəlxalq hüquqa uyğun, BMT-nin dövlətlərin bir-birini tanıması şərti əsasında danışıqlara hazır olduğunu elan edərsə, bu, müsbət dinamika olardı: “Yox, əgər danışıqlara hazır olduğunu deyib sülh müqaviləsinin imzalanması üçün şərtlərinin olduğunu desə, bu o deməkdir ki, Paşinyan kimlərinsə əlində vasitədir, ondan istifadə olunur”.

Sərdar Cəlaloğlu bildirib ki, Nikol Paşinyan əslində Rusiyanın təlimatları ilə hərəkət edir: “Hesab edirəm ki, Paşinyan müstəqil siyasət aparmır. Rusiyanın bölgədə qalmasında Moskva maraqlıdır. Bunun üçün də erməni faktorundan istifadə edir. Bu, həmişə belə olub. Az qala Ermənistanın dövlət büdcəsinin pulunu, hərbi təchizatını, texnikasını Rusiya verir”.

Partiya sədrinin qənaətincə, əslində ermənilər öz təbiətinə uyğun olaraq bir mərhələdə həm Rusiya, həm də Qərblə oynamağa və hər ikisindən istifadə etməyə çalışıb: “Ancaq bu oyunları baş tutmadı. Qərbdə müəyyən qüvvələr bildi ki, bu, oyundur. Düzdür, Avropa Birliyi Ermənistana 2,6 milyard avro ayırıb. Ancaq bu o demək deyil ki, həmin pulu dərhal İrəvana verəcək. Onlar bu pulu verəndə şərtlər qoyacaqlar. Ermənistan da bu şərtləri icra edə bilməyəcək. Bu halda da ermənilərə pul verilməyəcək. Pulun ayrılması o demək deyil ki, dərhal veriləcək. Elə şərtlər irəli sürüləcək ki, bu, Rusiyanın maraqlarına uyğun olmayacaq. Ermənistan da bunu icra etməkdən çəkinəcək. Beləcə həmin pulları ala bilməyəcək”.

Xatırladaq ki, dünən Ermənistan hökumətinin iclasında baş nazir vəzifəsini icra edən Nikol Paşinyan sülh danışıqlarına hazır olduğunu elan edib.

“Sülh və sabitliyin alternativi yoxdur. Ermənistan hökuməti bölgə üçün dinc inkişaf dövrü açmaq vəzifəsini yerinə yetirməyə qərarlıdır”, - Paşinyan deyib.

Pravda.az

ƏVVƏLKİ XƏBƏR

"Bu adam dəlidirsə, niyə ailəsi var?" - Bakıda qətl törədən şəxs məhkəməyə gətirilmir

SONRAKI XƏBƏR

Ağdamda ata oğlunun məzarını qazdı - Meyitə verilən işgəncə hər kəsi dəhşətə gətirdi - VİDEO