Putin Ermənistana dəvəti cavabsız qoyur - Artıq İrəvan prioritet deyil

Putin Ermənistana dəvəti cavabsız qoyur - Artıq İrəvan prioritet deyil<span class="qirmizi"></span>

 

Rusiya prezidenti Vladimir Putin Təhlükəsizlik Şurasının üzvləri ilə Qarabağdakı vəziyyəti müzakirə edib. Üçtərəfli sazişin bütün müddəalarının təcili həyata keçirilməsinin zəruriliyi vurğulanıb. Ermənilər iddia edir ki, üçtərəfli sazişin bütün müddəalarının həyata keçirilməsi Azərbaycanın tələblərinin yerinə yetirilməsi deməkdir. Ancaq saziş üçtərəflidir və buna Ermənistan tərəfi də qol çəkib.

Peskov Paşinyanın Qarabağdakı sülhməramlıların fəaliyyəti ilə bağlı iddialarına münasibət bildirib. O bəyan edib ki, Rusiya sülhməramlılarının Qarabağdakı fəaliyyəti ilə bağlı Ermənistanda mövcud olan məsələlər dialoq yolu ilə aydınlaşdırıla bilər.

“Əsas başlanğıc nöqtəsi olan üçtərəfli sənədlər var. Əsas odur ki, bu sənədlər çərçivəsində tərəflərin üzərinə götürdüyü bütün öhdəliklər yerinə yetirilsin. Suallar varsa, təbii ki, onlara cavab verilməlidir. Eyni zamanda, erməni tərəfi ilə müxtəlif səviyyələrdə mövcud olan sıx təmaslar mövcud məsələlərə aydınlıq gətirməyə imkan verəcək”, - deyə o qeyd edib.

Peskov onu da bildirib ki, Putin hələ Ermənistana səfər etməyi planlaşdırmır. Rusiya prezidenti Vladimir Putinin gündəmində Ermənistana səfəri yoxdur. “Əlbəttə, dəvət var. Ancaq indi dəqiq tarixlər yoxdur”, - deyə Rusiya liderinin mətbuat katibi bildirib.

Putin Ermənistana nə vaxt səfər edəcək? Yaxın gələcəkdə bunun baş verməsi ehtimalı azdır.

Dünən Rusiya Xarici İşlər Nazirliyi Qarabağdakı gərgin vəziyyətə cavab verib. Rusiya Xarici İşlər Nazirliyinin bəyanatında deyilir ki, Moskva Laçın dəhlizi və təmas xəttinin digər hissələri ətrafında vəziyyətin gərginləşməsindən çox narahatdır: “Rusiya sülhməramlıları yerlərdə vəziyyəti sabitləşdirmək üçün bütün lazımi səyləri göstərir. Bütün kanallar və bütün səviyyələrdə, o cümlədən ölkənin ali rəhbərliyi ilə hər iki partiya ilə fəal iş aparılır. Rusiya Federasiyasının xarici işlər naziri Lavrov azərbaycanlı və erməni həmkarları ilə sıx təmasdadır. Biz tərəfləri təmkinli olmağa və atəşkəs rejiminə riayət etməyə çağırırıq”.

Rusiyanın rəhbərlik etdiyi Kollektiv Təhlükəsizlik Müqaviləsi təşkilatı bəyanat yayaraq, tərəfləri güc tətbiq etməkdən çəkinməyə və fikir ayrılıqlarını müstəsna olaraq diplomatik üsullarla aradan qaldırmağa çağırıb.

ABŞ dövlət katibi Entoni Blinken Türkiyənin xarici işlər naziri Mövlud Çavuşoğlu ilə telefon danışığı aparıb. Həmsöhbətlər Qarabağ məsələsinə də toxunublar. Blinken qeyd edib ki, Birləşmiş Ştatlar Azərbaycan və Ermənistan arasında dialoqu təşviq etmək və münaqişənin uzunmüddətli siyasi həllinə nail olmaq üçün ATƏT-in Minsk qrupunun həmsədri kimi ikitərəfli prosesdə iştirak etməyə hazırdır.

Avropa İttifaqı da öz növbəsində Ermənistan və Azərbaycanı hərbi əməliyyatları dayandırmağa çağırıb. “Euronews” telekanalının məlumatına görə, Avropa Şurasının prezidenti Şarl Mişel iki ölkənin liderləri ilə bu məsələni aktiv şəkildə müzakirə edir.

Asif Cəfərov
Ordu.az

 

Mənbə: ordu.az